<div id="MiddleColumn_internal"> <p style="text-align: justify; ">সাধাৰণতে ভৰিত নানা সমস্যা হোৱা দেখা যায়। যেনে- গোৰোহা ফটা, খজুৱতি, কৰ্ন, ভেঁকুৰ আদি। এইবোৰৰ সমাধানৰ সহজ উপায় তলত উল্লেখ কৰা হ’ল।</p> <h3 style="text-align: justify; ">গোৰোহা ফটা সমস্যাৰ বাবে ঘৰতে কৰিব পৰা উপায়</h3> <ul style="text-align: justify; "> <li>এমুঠি নিমপাত গুড়ি কৰি এক চাহ চামুচেৰে ভাল হালধি গুড়ি মিহলাই অলপ গোলাপ জল দি ১০-১৫ মিনিট পেক বনাই সপ্তাহত তিনি দিন সানক।</li> <li>গৰম ভাত তিনি চামুচ, মৌ, তিল তেল একেলগে মিহলাই গোৰোহাত লাহে লাহে মালিচ কৰক। ১০-১৫ মিনিটৰ পিছত ঠাণ্ডা পানীৰে ধুই দিব। তাৰ পিছত গোলাপজলৰ লগত গ্লিচাৰিণ মিহলাই লগাই থ’ব।</li> <li>পকা অমিতাৰ লগত নেমুৰ ৰস মিহলাই গোৰোহাত লগাই ১৫-২০ মিনিট থ’ব।</li> <li>নিশা শোৱাৰ আগতে ভৰি দুখন ধুই ল’ব। সম পৰিমাণে জলফাই তেল আৰু নাৰিকল তেল মিহলাই ভৰিত সানি থ’ব গোটেই নিশা।</li> <li>যিসকলৰ ভৰি ফাটি ছটাছটকৈ এৰাই যায়, তেনে লোকে আম গছৰ ৰস অলপ, পানী মিহলাই ভৰি দুখন তিয়াই থ’ব।</li> </ul> <h3 style="text-align: justify; ">ঘৰুৱা দিহাৰে ভৰিৰ কৰ্নৰ সমস্যা সমাধান কৰক</h3> <ul style="text-align: justify; "> <li>চকৰ গুড়ি পানীৰ লগত মিহলাই কৰ্ন হোৱা অংশত ২০-২৫ মিনিট সদায় লগাওক। </li> <li>চাহগছৰ তেলৰ লগত নাৰিকল তেল মিহলাই ভৰিৰ কৰ্ন হোৱা ঠাইত মালিচ কৰক।</li> <li>১/২ কেঁচা আমৰ ৰসৰ লগত কেঁচা অমিতাৰ ৰস মিহলাই সংক্ৰমিত অংশত লগাই ১ ঘণ্টা ৰাখিব। পিছত পানীৰে ধুই দিব। দিনটোত ২-৩ বাৰ লগাব।</li> <li>হালধিৰ গুড়িৰ লগত মৌ মিহলাই সদায় লগাব। </li> <li>গোলকৈ নেমু বা পিঁয়াজৰ টুকুৰা কাটি কৰ্নৰ ওপৰত বান্ধি গোটেই নিশা থৈ দিব।</li> </ul> <h3 style="text-align: justify; ">ভেঁকুৰ সংক্ৰমণ নিৰ্মূলৰ উপায়</h3> <ul style="text-align: justify; "> <li>অলপমান বেকিং পাউদাৰ সংক্ৰমিত অংশত পাতলকৈ সানি ১০-১৫ মিনিটৰ পিছত পানীৰে ধুই শুকান কাপোৰেৰে মচি দিব। সপ্তাহত তিনি দিনকৈ লগাব।</li> <li>কিছুমানৰ গোৰোহাত এই সমস্যা হয়, তেনে লোকে পিঁয়াজৰ ৰস সানি থ’ব দিনটোত দুবাৰকৈ। জোতা পিন্ধাৰ আগতে মোজাত এক ফোটা নহৰু ভৰাই থ’ব।</li> <li>আঙুলিৰ ফাঁকত বিশেষকৈ এই ৰোগে দেখা দিয়ে। চাহ গছৰ পৰা এবিধ তেল ওলায়, সেই তেলৰ ৪০ টোপালমান পানীত দি চৰিয়া এটাত লৈ ভৰিখন তিয়াই থ’ব ১০-১৫ মিনিটমান। সপ্তাহত তিনি দিনকৈ এনেদৰে কৰিব।</li> </ul> <h3 style="text-align: justify; ">ভৰিৰ খজুৱতিৰ সমস্যাৰ সমাধান</h3> <ul style="text-align: justify; "> <li>সংক্ৰমিত অংশত ছালকুঁৱৰীৰ ৰস সদায় লগাব।</li> <li>নিমপাত ভালদৰে ধুই ৰ’দত শুকুৱাই গুড়ি কৰি এটা বটলত ভৰাই থ’ব। সেই গুড়ি সদায় ভৰিৰ যি ঠাইত খজুৱতি হৈছে, তাত পানীৰ লগত মিহলাই পেষ্ট বনাই সানিব।</li> </ul> <p style="text-align: justify; "><b><i>লেখিকা: বৰ্ণালী ভট্টাচাৰ্য, অসমীয়া প্ৰতিদিন।</i></b></p> </div>