<div id="MiddleColumn_internal"> <p style="text-align: justify; "><span style="text-align: start; float: none; ">കുട്ടികളില് ഹൃദ്രോഗ സാധ്യതയുണ്ട്, ഹൃദയസംബന്ധമായ പ്രശ്നങ്ങളുണ്ടെന്ന് അറിഞ്ഞാല് ഏത് മാതാപിതാക്കളാണ് തളര്ന്നുപോകാത്തത്. ഹൃദയസംബന്ധമായ തകരാറുകള് കണ്ടെത്താനും ചികിത്സിക്കാനുമുള്ള നൂതനരീതികള് ഇന്നുണ്ട്. രോഗലക്ഷണങ്ങളെക്കുറിച്ചും ചികിത്സകളെക്കുറിച്ചും മാതാപിതാക്കളുടെ ആശങ്കകളും അവയ്ക്കുള്ള ഉത്തരവും.</span></p> <h3 class="text-blue" style="text-align: justify; ">കുട്ടികളില് ഏതു പ്രായത്തിലാണ് ഹൃദ്രോഗം കണ്ടുവരുന്നത്?</h3> <p style="text-align: justify; "><br style="text-align: start; " /><span style="text-align: start; float: none; ">പ്രധാനമായും രണ്ടു രീതിയിലാണ് ഹൃദ്രോഗം കുട്ടികളില് കണ്ടുവരുന്നത്. ജന്മനാലുള്ളതും അല്ലാത്തവയും. ഭൂരിഭാഗവും ജന്മനായുള്ള ഹൃദയവൈകല്യങ്ങള്ക്കൊണ്ടുള്ളവയാണ്. ഹൃദയഭിത്തിയിലുള്ള ദ്വാരങ്ങള് (എ.എസ്.ഡി. - വി.എസ്.ഡി.), അടയാത്ത ഹൃദയധമനികള്, ഹൃദയധമനികളുടെ ചുരുങ്ങല് (എം.എസ്.ടി.എസ്.പി.എസ്), സ്ഥാനം തെറ്റിയ ഹൃദയധമനികള്, ഹൃദയപേശികളെ ബാധിക്കുന്ന അണുബാധകള്, ഹൃദയപേശികളുടെ അസാധാരണമായ വികാസങ്ങള്, ഹൃദയാവരണത്തിനു സംഭവിക്കുന്ന വീക്കം, വാതപ്പനിയുടെ കൂടെ വരുന്ന ഹൃദയത്തകരാറുകള് തുടങ്ങിയവയാണ് ജന്മനാല് കുട്ടികളില് ഹൃദയത്തെ ബാധിക്കുന്ന തകരാറുകള്.</span></p> <h3 class="text-blue" style="text-align: justify; ">ഹൃദ്രോഗം പാരമ്പര്യമായി ഉണ്ടാകുന്നതാണോ?</h3> <p style="text-align: justify; "><br style="text-align: start; " /><span style="text-align: start; float: none; ">പാരമ്പര്യം ഹൃദ്രോഗത്തിന് പലഘടകങ്ങളില് ഒന്നുമാത്രമാണ്. എന്നാല് ജന്മവൈകല്യമുള്ള കുട്ടികളുള്ളവര്, മാസം തികയാതെ പ്രസവിച്ച കുട്ടികള് എന്നിവര്ക്ക് ഹൃദയവൈകല്യങ്ങള് സംഭവിക്കാനുള്ള സാധ്യത കൂടുതലാണ്.</span></p> <h3 class="text-blue" style="text-align: justify; ">കുട്ടികളില് കണ്ടുവരുന്ന ഹൃദ്രോഗത്തിന്റെ പ്രധാന ലക്ഷണങ്ങള് എന്തെല്ലാമാണ്?</h3> <p style="text-align: justify; "><br style="text-align: start; " /><span style="text-align: start; float: none; ">കുട്ടിക്ക് ജന്മനാ നീലനിറം, അസാധാരണമായ ഹൃദയമിടിപ്പും അണപ്പും, പാല് കുടിക്കാനുള്ള ബുദ്ധിമുട്ട്, ഹൃദയമിടിപ്പില് വ്യതിയാനങ്ങളുണ്ടാവുക, അസാധാരണമായ രക്തസമ്മര്ദം ഇവയൊക്കെയാണ് കുട്ടികളില് കണ്ടുവരുന്ന ഹൃദ്രോഗത്തിന്റെ ലക്ഷണങ്ങള്.</span></p> <h3 class="text-blue" style="text-align: justify; ">എന്തൊക്കെ രീതിയില് ഹൃദ്രോഗം കണ്ടെത്താം?</h3> <p style="text-align: justify; "><br style="text-align: start; " /><span style="text-align: start; float: none; ">എക്സ്റേ, ഇ.സി.ജി., ഇക്കോടെസ്റ്റ് തുടങ്ങിയവയിലൂടെ കൃത്യമായി രോഗനിര്ണയം നടത്തി ഹൃദയവൈകല്യങ്ങള് കണ്ടെത്താം.<span> </span></span><br style="text-align: start; " /></p> <p style="text-align: justify; "><span style="text-align: start; float: none; "> </span></p> <h3 class="text-blue" style="text-align: justify; ">ഹൃദ്രോഗം സങ്കീര്ണമായ അവസ്ഥയിലെത്തുന്നത് എപ്പോഴാണ്?</h3> <p style="text-align: justify; "><br style="text-align: start; " /><span style="text-align: start; float: none; ">ഹൃദയവൈകല്യങ്ങള് കുട്ടികളില് അപകടങ്ങള് സൃഷ്ടിക്കാറുണ്ട്. കൃത്യസമയത്ത് ചികിത്സ ലഭിക്കാതിരുന്നാല് കുട്ടിക്ക് നീലനിറം, തൂക്കക്കുറവ്, വളര്ച്ചക്കുറവ്, ബുദ്ധിവികസിക്കാതിരിക്കുക, ശ്വാസതടസം, നെഞ്ചുവേദന, ഹൃദയാഘാതം, ഹൃദയപേശികള്ക്ക് അണുബാധ തുടങ്ങിയ അപകടങ്ങള്ക്ക് സാധ്യതയുണ്ട്.</span></p> <h3 class="text-blue" style="text-align: justify; ">നൂതന ചികിത്സാ മാര്ഗങ്ങള് രോഗത്തിന്റെ സങ്കീര്ണതകള് കുറയ്ക്കാന് പര്യപ്തമാണോ?</h3> <p style="text-align: justify; "><br style="text-align: start; " /><span style="text-align: start; float: none; ">ഏതു വൈകല്യമാണ്, എത്ര ഗുരുതരമാണ്, എത്രാം വയസില് കണ്ടെത്തുന്നു എന്നിവ ആശ്രയിച്ചാണ് ചികിത്സ നിര്ണ്ണയിക്കുന്നത്. നൂതന ശസ്ത്രക്രിയാമാര്ഗങ്ങള് ഇന്നുണ്ട്. ഹൃദയം തുറന്നുള്ള ശസ്ത്രക്രിയകള്വരെ ഇന്ന് നടത്തിവരുന്നു. കോയിന് ക്ലോഷര്, ബലൂണ് ആന്ജിയോ പ്ലാസ്റ്റി എന്നിവയൊക്കെ നൂതന ശസ്ത്രക്രിയ മാര്ഗങ്ങളാണ്.</span></p> <h3 class="text-blue" style="text-align: justify; ">പ്രതിരോധമാര്ഗങ്ങളിലൂടെ ഹൃദയവൈകല്യങ്ങള് ഒഴിവാക്കി നിര്ത്താമോ?</h3> <p style="text-align: justify; "><br style="text-align: start; " /><span style="text-align: start; float: none; ">ഹൃദയവൈകല്യങ്ങള് ഒഴിവാക്കാനുള്ള ചില മുന്കരുതലുകള്.</span></p> <p style="text-align: justify; ">a. ഗര്ഭകാലത്ത് അനാവശ്യ മരുന്നുകള് ഒഴിവാക്കുക.</p> <p style="text-align: justify; ">b .പോഷകാഹാരം കഴിക്കുക, അമിതാഹാരം ഒഴിവാക്കുക.</p> <p style="text-align: justify; ">c. മാസം തികയാതെയുള്ള പ്രസവം സംഭവിക്കാതെ സൂക്ഷിക്കുക.</p> <p style="text-align: justify; ">d. കൗമാരപ്രായക്കാരായ പെ ണ്കുട്ടികള് പ്രതിരോധകുത്തിവയ്പുകള് എടുക്കുക.</p> <h3 class="text-blue" style="text-align: justify; ">കുഞ്ഞുങ്ങളില് ഹൃദ്രോഗം ഉണ്ടാകാതിരിക്കാന് ഗര്ഭാവസ്ഥയില് അമ്മ അറിഞ്ഞിരിക്കേണ്ട കാര്യങ്ങള് എന്തൊക്കെയാണ്?</h3> <p style="text-align: justify; "><br style="text-align: start; " /><span style="text-align: start; float: none; ">ഗര്ഭകാലത്ത് കണ്ടുവരുന്ന പ്രമേഹം അമ്മയിലും കുഞ്ഞിലും ഏറെ പ്രശ്നങ്ങള് സൃഷ്ടിക്കുന്നുണ്ട്. പ്രമേഹരോഗിക്ക് മറ്റുള്ളവരെ അപേക്ഷിച്ച് ജന്മവൈകല്യങ്ങളുള്ള കുഞ്ഞ് ജനിക്കുവാനുള്ള സാധ്യത വളരെ കൂടുതലാണ്. ഗര്ഭകാല പ്രമേഹം നേരത്തെ കണ്ടെത്തി ചികിത്സിക്കുന്നതാണ് ഉത്തമം.</span></p> <h3 class="text-blue" style="text-align: justify; ">ലക്ഷണങ്ങളിലൂടെ ഹൃദയവൈകല്യങ്ങള് തിരിച്ചറിഞ്ഞാല് എന്താണ് ചെയ്യേണ്ടത്?</h3> <p style="text-align: justify; "><br style="text-align: start; " /><span style="text-align: start; float: none; ">ലക്ഷണങ്ങളിലൂടെ കുട്ടികളിലെ ഹൃദയവൈകല്യം മാതാപിതാക്കള്ക്ക് തിരിച്ചറിയാനാവും. ലക്ഷണങ്ങള് കണ്ടാല് ഉടന് കുട്ടിക്ക് ആവശ്യമായ ചികിത്സ ലഭ്യമാക്കണം. ഹൃദയവൈകല്യമുള്ള കുട്ടികളെ മറ്റു കുട്ടികളില്നിന്നും അകറ്റി നിര്ത്തരുത്.</span></p> <h3 class="text-blue" style="text-align: justify; ">സാമൂഹികമാറ്റങ്ങള് വരുത്തേണ്ട ആവശ്യകത?</h3> <p style="text-align: justify; "><br style="text-align: start; " /><span style="text-align: start; float: none; ">ഹൃദയവൈകല്യമുള്ള കുട്ടികളുടെ മാതാപിതാക്കള് തമ്മില് സംഘങ്ങള് രൂപീകരിക്കുക. ഇതുവഴി പ്രശ്നങ്ങള് പരസ്പരം തുറന്നു സംസാരിക്കാന് കഴിയും. ഗവണ്മെന്റ് തലത്തിലുള്ള ചികിത്സാസഹായങ്ങളും മറ്റ് ആനുകൂല്യങ്ങളും നേടിയെടുക്കാവുന്നതാണ്.</span></p> <p class="text-purple" style="text-align: justify; "><i><b>കടപ്പാട്: ഡോ. സിസ്റ്റര്. ബ്രിജിറ്റ<span> </span><br />പീഡിയാട്രീഷന്<span> </span><br />മേരിഗിരി ഹോസ്പിറ്റല്, ഭരണങ്ങാനം</b></i></p> </div>