<div id="MiddleColumn_internal"> <p style="text-align: justify; "><span style="text-align: left; float: none; ">കരിമ്പനി ‘</span><b style="text-align: left; ">ബ്ളാക്ക് ഫീവർ’</b><span style="text-align: left; float: none; "><span> </span>എന്ന് ഇംഗ്ളീഷിലും ‘</span><b style="text-align: left; ">കാല അസർ</b><span style="text-align: left; float: none; ">’ എന്ന് ഹിന്ദിയിലും അറിയപ്പെടുന്നു. “</span><b style="text-align: left; ">വിസെറൽ ലെയിഷ്മാനിയാസിസ്</b><span style="text-align: left; float: none; ">” എന്നാണ് വൈദ്യശാസ്ത്രപരമായി ഈ രോഗാവസ്ഥയെ വിളിക്കുന്നത്. പടർന്നു പിടിക്കാൻ സാധ്യതയുള്ള ഇത് സാധാരണയായി ഉഷ്ണമേഖലാ പ്രദേശങ്ങളിലും മിതശീതോഷ്ണമേഖലാ പ്രദേശങ്ങളിലുമാണ് കാണപ്പെടുന്നത്. ലോകാരോഗ്യ സംഘടനയുടെ കണക്ക് അനുസരിച്ച് വർഷം തോറും അഞ്ച് ലക്ഷം ആളുകളെ കരിമ്പനി ബാധിക്കുന്നു.</span></p> <p style="text-align: justify; ">ഇന്ത്യയിൽ 52 ജില്ലകളിൽ കരിമ്പനി ബാധ വഷളായതായി റിപ്പോർട്ടുചെയ്തിട്ടുണ്ട്.<span> </span><i>ലെയിഷ്മാനിയ അണുബാധ, ലെയിഷ്മാനിയാസിസ്, ഡംഡം ഫീവർ, ബ്ളാക്ക് സിക്ക്നെസ്</i><span> </span>എന്നും ഇതിനെ വിളിക്കുന്നു.</p> <h3 style="text-align: justify; "><b>കാരണങ്ങൾ <br /></b></h3> <p style="text-align: justify; "><i>ലെയിഷ്മാനിയ</i><span> </span>വംശത്തിൽപ്പെട്ട ഒരു ഏകകോശ പരാദമാണ് കരിമ്പനിക്ക് കാരണമാകുന്നത്. ഒരു തരം മണലീച്ചയിലാണ് ഇത് വാസമുറപ്പിക്കുക. അണുബാധയുള്ള മണലീച്ചയുടെ കടിയിലൂടെ ഇത് മനുഷ്യരിലെത്തുകയും കരിമ്പനിക്ക് കാരണമാകുകയും ചെയ്യുന്നു.</p> <p style="text-align: justify; ">സസ്തനികളുടെ രക്തമാണ് പെൺ മണലീച്ചയുടെ ആഹാരം. ഇവ കടിക്കുന്നതു മൂലം ലെയിഷ്മാനിയ പരാദങ്ങൾ മനുഷ്യരിലുമെത്തിച്ചേരുന്നു. നനവുള്ള സ്ഥലങ്ങൾ, ജൈവമാലിന്യങ്ങൾ കുമിഞ്ഞുകൂടുന്ന സ്ഥലങ്ങൾ, കന്നുകാലിത്തൊഴുത്തുകൾ, ഈർപ്പമുള്ള സ്ഥലത്തെ വിള്ളലുകൾ തുടങ്ങിയ സ്ഥലങ്ങളിൽ ഇവ പ്രജനനം നടത്തുന്നു.</p> <p style="text-align: justify; ">വിസെറൽ ലെയിഷ്മാനിയാസിസ് എന്നും കരിമ്പനിക്ക് പേരുണ്ടെന്ന് പറഞ്ഞല്ലോ.<span> </span><i>വിസെറ</i><span> </span>എന്നാൽ ആന്തരികാവയവങ്ങൾ എന്നാണ് അർത്ഥം. കരൾ, പ്ളീഹ, അസ്ഥി മജ്ജ എന്നിവിടങ്ങളിൽ വച്ച് ലെയിഷ്മാനിയ പരാദങ്ങൾ ഇരട്ടിക്കുന്നു.</p> <p style="text-align: justify; ">ദാരിദ്ര്യരേഖയ്ക്ക് താഴെയുള്ളവരാണ് കൂടുതലായും ഇതിനിരയാവുന്നതെന്നത് നിർഭാഗ്യകരമായ ഒരു സത്യമാണ്. കുറഞ്ഞ പ്രതിരോധശേഷി, പോഷകാഹാരക്കുറവ്, ശരിയായ താമസസൗകര്യമില്ലാത്തത്, ശുചിത്വത്തെക്കുറിച്ചുള്ള അവബോധമില്ലായ്മ, സാമ്പത്തികശേഷി ഇല്ലാതിരിക്കൽ തുടങ്ങിയവയെല്ലാം ഇതുമായി ബന്ധപ്പെട്ട ഘടകങ്ങളാണ്.</p> <h3 style="text-align: justify; "><b>ലക്ഷണങ്ങൾ <br /></b></h3> <p style="text-align: justify; ">പരാദം ഒരു വ്യക്തിയുടെ ശരീരത്തിൽ പ്രവേശിച്ച് ഏതാനും മാസങ്ങൾ കഴിഞ്ഞ ശേഷവും ലക്ഷണങ്ങൾ പ്രകടമാവണമെന്നില്ല. സാധാരണഗതിയിൽ 2-6 മാസം വരെയാണ് ഇങ്കുബേഷൻ സമയം.</p> <p style="text-align: justify; ">കരിമ്പനിയുടെ ചില ലക്ഷണങ്ങളാണ് ഇനി പറയുന്നത്;</p> <ul style="text-align: justify; "> <li>മാസങ്ങളോളം നീണ്ടുനിൽക്കുന്ന പനി</li> <li>വിശപ്പില്ലായ്മ</li> <li>പ്രത്യേക കാരണമൊന്നുമില്ലാതെ ഭാരം കുറയുക</li> <li>നീണ്ടുനിൽക്കുന്ന തളർച്ച</li> <li>പ്ളീഹ വീങ്ങുക</li> <li>കരൾ വീക്കം</li> <li>ചർമ്മത്തിന്റെ നിറവ്യത്യാസം, സാധാരണഗതിയിൽ ചാരം കലർന്ന കറുപ്പ് നിറം- ഇതാണ് കരിമ്പനി എന്ന പേര് ലഭിക്കാൻ കാരണം</li> </ul> <h3 style="text-align: justify; "><b>രോഗനിർണയം <br /></b></h3> <p style="text-align: justify; ">കരിമ്പനി നിർണയിക്കുന്നതിന് ഇനി പറയുന്നവ ഉൾപ്പെടെയുള്ള പരിശോധനകൾ നടത്തുന്നു;</p> <ul style="text-align: justify; "> <li>പരാദത്തിന്റെ സാന്നിധ്യം അറിയുന്നതിനായി പ്ളീഹ, കരൾ, അസ്ഥി മജ്ജ തുടങ്ങിയവയിൽ നിന്നുള്ള ടിഷ്യൂ സ്പെസിമനുകൾ ശേഖരിക്കുന്നു.</li> <li>അണുബാധയ്ക്കെതിരെ ആന്റിബോഡികളുടെ സാന്നിധ്യമറിയുന്നതിനുള്ള രക്ത പരിശോധന.</li> </ul> <h3 style="text-align: justify; "><b>ചികിത്സയും പ്രതിരോധവും <br /></b></h3> <h4><b>ചികിത്സ <br /></b></h4> <p style="text-align: justify; ">സുരക്ഷിതവും ഫലപ്രദവുമായ ആന്റി-ലെയിഷ്മാനിയൽ മരുന്നുകളൊന്നും നിലവിൽ ലഭ്യമല്ല. പെന്റാവാലന്റ് ആന്റിമണി കുത്തിവയ്പ് ഉപയോഗിക്കാവുന്നതാണ്.</p> <h4><b>പ്രതിരോധം <br /></b></h4> <p style="text-align: justify; ">നിലവിൽ ഇതിനെതിരെ പ്രതിരോധ വാക്സിനുകൾ ലഭ്യമല്ല. മണലീച്ചയുടെ കടി ഏൽക്കാതിരിക്കുകയാണ് ഇതിനെ പ്രതിരോധിക്കുന്നതിനുള്ള ഫലപ്രദമായ മാർഗം. ഇതിനായി;</p> <ul style="text-align: justify; "> <li>ഇൻസെക്റ്റ് റെപ്പല്ലന്റുകൾ ഉപയോഗിക്കുക</li> <li>രാത്രിസമയത്ത് കൊതുകുവല ഉപയോഗിക്കുക</li> <li>വൈകുന്നേരങ്ങളിൽ പുറത്തുള്ള ജോലികൾ ഒഴിവാക്കുക</li> <li>ശരിയായ രീതിയിൽ ശരീരം മറയത്തക്കവണ്ണമുള്ള വസ്ത്രങ്ങൾ ധരിക്കുക</li> <li>ഇരുണ്ടതും ചെളി നിറഞ്ഞതുമായ പ്രദേശങ്ങൾ ഒഴിവാക്കുക</li> </ul> <h3><b>സങ്കീർണതകൾ <br /></b></h3> <p style="text-align: justify; ">ചികിത്സ നൽകിയില്ലെങ്കിൽ കരിമ്പനി ജീവനു തന്നെ ഭീഷണിയായേക്കാം. പ്രതിരോധശേഷി നശിക്കുന്നതിനാൽ, എച്ച്ഐവി ബാധിക്കുന്നതിനൊപ്പം കരിമ്പനിയും ബാധിക്കാം.</p> </div>