<div id="MiddleColumn_internal"> <p style="text-align: justify; ">അപസ്മാരം പല രോഗങ്ങളുടെയും ബാഹ്യലക്ഷണമായി കാണാറുണ്ട്. ഒരിക്കല് അപസ്മാരമുണ്ടായവരില് 75 ശതമാനം പേര്ക്ക് മൂന്നു കൊല്ലത്തിനുള്ളില് വീണ്ടുമുണ്ടാവാന് സാധ്യതയുണ്ട്.അപസ്മാരരോഗം അല്പം പേടിക്കേണ്ട രോഗം തന്നെയാണ്.</p> <p style="text-align: justify; ">ഒന്നില്ക്കൂടുതല് തവണ അപസ്മാരമുണ്ടായാല് മാത്രമേ ഒരാള്ക്ക് അപസ്മാരരോഗമുണ്ടെന്നു പറയാനാവൂ.</p> <p style="text-align: justify; ">ഒരിക്കല് പനി വന്നപ്പോള് അപസ്മാരമുണ്ടായ ഒരു കുട്ടി, ഭക്ഷണം കഴിക്കാതെ സ്കൂളില് അസംബ്ലിക്കു നില്ക്കുമ്പോള് തളര്ന്നുവീണു, അപസ്മാരംപോലെ ഇളക്കമുണ്ടായ ഒരു വിദ്യാര്ത്ഥി- ഇവര്ക്കൊക്കെ അപസ്മാരരോഗമുണ്ടെന്നു പറയാന് പറ്റില്ല.</p> <p style="text-align: justify; ">പല മാനസികരോഗങ്ങളിലും അപസ്മാരംപോലെയുള്ള ലക്ഷണങ്ങള് കാണാറുണ്ട്. കൂടാതെ വ്യക്തിപരവും കുടുംബപരവും സാമൂഹികവുമായ പല സംഘര്ഷാവസ്ഥകളും അപസ്മാരരോഗിക്ക് നേരിടേണ്ടിവരും.</p> <h3 style="text-align: justify; ">കാരണങ്ങള്</h3> <p style="text-align: justify; ">ജനിതക രോഗങ്ങള് പാരമ്പര്യമായി വരുമെന്ന് പഠനങ്ങള് തെളിയിച്ചിട്ടുണ്ട്. പക്ഷേ, ജനിതകകാരണങ്ങള്കൊണ്ടു മാത്രം ഒരാള്ക്ക് അപസ്മാരമുണ്ടാവില്ല.</p> <p style="text-align: justify; ">രോഗികളുടെ ഉറക്കമിളയ്ക്കല്, ശക്തിയായ പനി, ഉത്കണ്ഠയും വൈകാരികവിക്ഷോഭവും, ചില മരുന്നുകളുടെ ഉപയോഗം, തുടര്ച്ചയായ ടിവി കാണല്, തെറ്റുന്ന മാസമുറ എന്നിങ്ങനെ പല കാരണങ്ങള് കൊണ്ട് അപസ്മാരമുണ്ടാകാം.</p> <p style="text-align: justify; ">1. പ്രസവസമയത്ത് കുട്ടിയുടെ തലച്ചോറിനേല് ക്കുന്ന ക്ഷതം, ബുദ്ധിമുട്ടുണ്ടാക്കിയ പ്രസവം, വേദന തുടങ്ങി വളരെ കഴിഞ്ഞുള്ള പ്രസവം, ഫോര്സെപ്സ് ഉപയോഗിച്ചുള്ള പ്രസവം<br />2. ജന്മനാ മസ്തിഷ്കത്തിനുണ്ടാകുന്ന വൈകല്യങ്ങള്.<br />3. റോഡപകടം, വീഴ്ച എന്നിവ വഴി തലച്ചോറിനേല് ക്കുന്ന ക്ഷതം<br />4. മസ്തിഷ്കത്തിലെ വീക്കം, അണുബാധ മുതലായവ.<br />5. മസ്തിഷ്കത്തിലെ മുഴകള്, രക്തസ്രാവം, രക്തക്കുഴലുകള്ക്ക് ജന്മനാ ഉണ്ടാകുന്ന വൈകല്യങ്ങള്, ബോധക്ഷയം.<br />6. മസ്തിഷ്കത്തിനകത്ത് നടത്തുന്ന ശസ്ത്രക്രിയകള്.<br />7. വൃക്കകളുടെ പ്രവര്ത്തനത്തിലുണ്ടാകുന്ന തകരാറുകള്.<br />8. രക്തത്തിലെ പഞ്ചസാര, ലവണങ്ങള്, കാത്സ്യം എന്നിവയുടെ ഏറ്റക്കുറച്ചിലുകള്.<br />9. മദ്യം, മയക്കുമരുന്ന് എന്നിവയുടെ ഉപയോഗം<br />10. പനിമൂലം കുട്ടികള്ക്ക് ഇടയ്ക്കിടെയുണ്ടാകുന്ന/ ദീര്ഘനേരം നീണ്ടുനില്ക്കുന്ന അപസ്മാരം.</p> <h3 style="text-align: justify; ">രോഗലക്ഷണങ്ങള്</h3> <p style="text-align: justify; ">അപസ്മാരരോഗലക്ഷണങ്ങള് ശ്രദ്ധിച്ചാല് മനസ്സിലാവുന്നതാണ്. രോഗി, ഒരാക്രോശത്തോടെ ബോധമില്ലാതെ മറിഞ്ഞുവീഴും, ദൃഷ്ടികള് മേലോട്ടുപോയി കൈകാലുകള് ഒരേ ക്രമത്തില് വേഗത്തില് മടങ്ങുകയും നിവരുകയും ചെയ്യും,ശരീരം മുഴുവന് ഇളകും, നാവ് കടിച്ചുമുറിക്കും,ശരീരം മുറിയും.</p> <p style="text-align: justify; ">ചിലപ്പോള് അറിയാതെ മലമൂത്രവിസര്ജനം നടത്തുന്നു. ഇത് രണ്ടുമൂന്ന് മിനിറ്റ് നീണ്ടുനില്ക്കും. ചലനങ്ങള് സാവധാനം നില്ക്കുകയും രോഗി ഉറങ്ങുകയും ചെയ്യുന്നു.</p> <p style="text-align: justify; ">ചിലപ്പോള് രോഗി പെട്ടെഴുന്നേഴുന്നേറ്റ് അക്രമസ്വഭാവം കണിച്ചെന്നുവരും. ഇത് കുറച്ചുനേരം നീണ്ടുനിന്നേക്കാം. മണിക്കൂറുകളോ ദിവസം മുഴുവനോ നീണ്ടുനില്ക്കുന്ന തലവേദനയും സാധാരണമാണ്.</p> <p style="text-align: justify; ">1. അസഹ്യമായ ഗന്ധം, ദുഷിച്ച വസ്തുക്കളുടെ സ്വാദ്, ദു:ഖകരമായ ചിന്തകള്, അകാരണമായ ഭയം ഇതെല്ലാം, അല്ലെങ്കില് ഏതെങ്കിലുമൊന്ന് അനുഭവപ്പെട്ടശേഷമാവും ബോധം നശിക്കുന്നത്.</p> <p style="text-align: justify; ">2. ചിലര്ക്ക് അമിതമായ ഉത്ക്കണ്ഠ മാത്രമാവും. മറ്റു ചിലര്ക്ക് കടുത്ത വൈകാരികവിക്ഷോഭം അനുഭവപ്പെടും. ഇല്ലാത്ത വസ്തുക്കള് ഉണ്ടെന്നു തോന്നുക, പരിചയമില്ലാത്ത സ്ഥലം പരിചയമുണ്ടെന്നു തോന്നുക, പരിചയമുള്ള സ്ഥലം പരിചയമില്ലെന്നു തോന്നുക- ഇതൊക്കെ ചില ലക്ഷണങ്ങളാണ്. ചിലപ്പോള് എന്തെങ്കിലും ശരീരഭാഗങ്ങള് അനിയന്ത്രിതമായി കുറച്ചുനേരം പ്രവര്ത്തിച്ചെന്നുവരാം.</p> <p style="text-align: justify; ">3. തുടര്ച്ചയായ ഇമവെട്ടല്, ചവയ്ക്കല്, ഭക്ഷണം വിഴുങ്ങുന്നതുപോലെയുള്ള ചലനങ്ങള്, ഒരേ താളത്തിലും ക്രമത്തിലും കൈകൊട്ടുക മുതലായവ ഉദാഹരണമായി പറയാം. ചിലര്ക്ക് വിചിത്രവും അസ്വാസ്ഥ്യജനകവുമായ ലൈംഗികാനുഭൂതികളുണ്ടാകും.</p> <p style="text-align: justify; ">രോഗി ചിലപ്പോള് കരയും ചിരിക്കും വട്ടംതിരിയും ഓടും ചാടും- ഇങ്ങനെ പലതും ചെയ്യും. ഈ അവസ്ഥയില് പലപ്പോഴും രോഗിക്ക് ബോധമുണ്ടാവില്ല. വായിലുള്ള ഭക്ഷണം ചവയ്ക്കാതെ കൈയിലുള്ളത് മുറുകെപ്പിടിച്ച് അങ്ങനെയിരിക്കും. വിളിച്ചാലോ തൊട്ടാലോ അറിയില്ല.</p> <h3 style="text-align: justify; ">രോഗനിര്ണയം</h3> <p style="text-align: justify; ">അപസ്മാരരോഗം വിവിധതരത്തിലുണ്ട് എന്നതും വിവിധ കാരണങ്ങള് മൂലം രോഗം വരാം എന്നതുകൊണ്ടും രോഗനിര്ണയം എളുപ്പമല്ല.<br />രോഗത്തെക്കുറിച്ചുള്ള ശ്രദ്ധാപൂര്വമായ വിവരണമാണ് രോഗനിര്ണയത്തിന് ഏറ്റവുമധികം സഹായിക്കുന്നത്.</p> <p style="text-align: justify; ">ബോധം നഷ്ടപ്പെടുന്നുണ്ടോ. ഉണ്ടെങ്കില് അതിനു മുന്പുള്ള അനുഭവം, ബോധം വന്നതിനുശേഷമുള്ള അവസ്ഥ ഇതൊക്കെ വിശദമായി വിവരിക്കണം.</p> <p style="text-align: justify; ">ബന്ധുക്കളിലാര്ക്കെങ്കിലും അപസ്മാരമുണ്ടോ? രോഗിക്ക് ശാരീരികമായി മറ്റെന്തെങ്കിലും അസുഖങ്ങളുണ്ടോ, ചെറുപ്പത്തില് അപസ്മാരമുണ്ടായിട്ടുണ്ടോ, രോഗി മദ്യപിക്കുന്ന ആളാണോ, രോഗിയുടെ ജീവിതരീതി എങ്ങനെ ഇതൊക്കെ അറിയണം.</p> <p style="text-align: justify; ">രോഗനിര്ണയത്തിനും ചികിത്സ നിശ്ചയിക്കുന്നതിനും ഈ വിവരങ്ങളൊക്കെ അറിയേണ്ടത് ആവശ്യമാണ്.<br />രക്തപരിശോധന, ഇലക്ട്രോ എന്കഫലോഗ്രാം, തലയുടെ സി.ടി. സ്കാന് ഇവയും ആവശ്യമായിവരും.</p> <h3 style="text-align: justify; ">ചികിത്സ</h3> <p style="text-align: justify; ">അപസ്മാരരോഗത്തിന് ഫലപ്രദമായ പല മരുന്നുകളുമുണ്ട്. പുതിയ പുതിയ മരുന്നുകള് വിപണിയിലിറങ്ങുന്നുമുണ്ട്. പലതും പാര്ശ്വഫലങ്ങള് കുറഞ്ഞവയാണ്.</p> <p style="text-align: justify; ">ഡോക്ടറുടെ നിര്ദ്ദേശമനുസരിച്ച് കൃത്യമായ അളവില്, കൃത്യസമയത്ത് മുടങ്ങാതെ മരുന്നുകള് കഴിക്കണം. ഇടയ്ക്ക് ഡോക്ടറെ കണ്ട് പരിശോധിപ്പിക്കണം. അവസാനം അപസ്മാരമിളകിയശേഷം കുറഞ്ഞത് രണ്ടുകൊല്ലമെങ്കിലും മരുന്നുകള് കഴിക്കേണ്ടിവരും.</p> <p style="text-align: justify; ">ചിലപ്പോള്, മൂന്നോ നാലോ അതിലധികമോ കൊല്ലങ്ങള്. ചിലര്ക്ക് രോഗം മാറിയിട്ടുണ്ടെങ്കിലും ജീവിതകാലം മുഴുവന് മരുന്നു കഴിക്കേണ്ടിവരും. മരുന്നു കഴിക്കുന്നതിന്റെ മേല്നോട്ടം ഉത്തരവാദിത്വമുള്ള ഒരാളെ ഏല്പിക്കുന്നത് നന്ന്.</p> <p style="text-align: justify; ">ഡോക്ടറുടെ നിര്ദ്ദേശപ്രകാരം മാത്രമേ മരുന്നു നിര്ത്താവൂ. ചില മരുന്നുകള് ഗര്ഭമുള്ളപ്പോള് കഴിക്കുന്നത് ഗര്ഭസ്ഥശിശുവിന് ദോഷം ചെയ്യാന് സാധ്യതയുണ്ട്.</p> <p style="text-align: justify; ">മരുന്നു കഴിച്ചുകൊണ്ടിരിക്കുമ്പോള് ഗര്ഭധാരണം നടന്നിട്ടുണ്ടെങ്കില് വിവരം എത്രയും വേഗം ചികിത്സിക്കുന്ന ഡോക്ടറെ അറിയിക്കണം.</p> <h3 style="text-align: justify; ">മാനസികാരോഗ്യം</h3> <p style="text-align: justify; ">അപസ്മാരരോഗികള്ക്ക് മാനസികരോഗം, വിഷാദരോഗം സംശയരോഗം എന്നിവ വരാനുള്ള സാധ്യത അധികമാണ്. ഉന്മാദരോഗവും ഉണ്ടാകാറുണ്ട്. ഒരിക്കല് അപസ്മാരമിളകി, മാറിയ ശേഷം വീണ്ടും ഉണ്ടാവുന്നതിനിടയ്ക്കുള്ള കാലയളവില് ചിലര്ക്ക് മാനസികരോഗം വരാറുണ്ട്.</p> <p style="text-align: justify; ">ദീര്ഘകാലമായി അപസ്മാരരോഗമുള്ളവര്ക്ക് വ്യക്തിത്വവൈകല്യം വരാനുള്ള സാധ്യത കൂടുതലാണ്. ഇവര് പലപ്പോഴും മുന്ശുണ്ഠിക്കാരായി അനവസരത്തി ല് എടുത്തുചാടി പ്രതികരിക്കും.</p> <p style="text-align: justify; ">ചിലര് അമിതമായ ഭക്തിയും മതവിശ്വാസവുമുള്ളവരായിരിക്കും. ലൈംഗികകാര്യങ്ങളില് തീരെ താത്പര്യം കാണിക്കില്ല. ചിലര് സംസാരിക്കുമ്പോള് വാക്കുകള് തമ്മില് ഒട്ടിപ്പിക്കുന്നതുപോലെ തോന്നും.</p> <p style="text-align: justify; ">അപസ്മാര ചികിത്സയ്ക്കൊപ്പം മാനസികരോഗത്തിനും ചികിത്സ തേടണം. ഔഷധചികിത്സയും, മനശാസ്ത്രചികിത്സയും വേണം. രോഗിയുടെ ബന്ധുക്കളെ ഉള്പ്പെടുത്തിയുള്ള കൗണ്സിലിങ്ങും അത്യാവശ്യമാണ്.</p> <p style="text-align: justify; ">അപസ്മാരരോഗമുള്ളവരില് നല്ലൊരു ശതമാനം രോഗികള് പൂര്ണമായും രോഗശാന്തി കൈവരിക്കാറുണ്ട്. ഇവര്ക്ക് സമൂഹത്തിന്റെ മുഖ്യധാരയിലേക്കിറങ്ങിവരാന് കഴിയും.</p> <p style="text-align: justify; ">വൈകാരികമായും സാമൂഹികമായുമുള്ള പിന്തുണ അത്യാവശ്യമാണ്. പുനരധിവാസത്തിലൂന്നിക്കൊണ്ടുള്ള സമഗ്രമായൊരു ചികിത്സാപദ്ധതിയും കൊണ്ടുവരണം.</p> <h3 style="text-align: justify; ">അപസ്മാരമിളകുന്നതുകണ്ടാല് ?</h3> <p style="text-align: justify; ">വേണ്ടത്ര വായുസഞ്ചാരം ഉറപ്പുവരുത്തണം. ആളുകള് ചുറ്റുംകൂടി നില്ക്കരുത്. അബോധാവസ്ഥയില്, വായിലെ നുരയും പതയും ശ്വാസകോശങ്ങളില് കടന്ന് ന്യൂമോണിയ തുടങ്ങിയ രോഗങ്ങള് ഉണ്ടാവാതിരിക്കാന് രോഗിയെ ഒരു വശം ചെരിച്ചു കിടത്തുക.</p> <p style="text-align: justify; ">കൈകാലിട്ടടിക്കുന്നതു തടയാന് ബലം പ്രയോഗിക്കരുത്. ബലപ്രയോഗംകൊണ്ട് ഫലമില്ലെന്നു മാത്രമല്ല, ശാരീരികമായ ക്ഷതങ്ങളേല്ക്കാന് സാധ്യത കൂടുകയും ചെയ്യും.</p> <p style="text-align: justify; ">കൈയില് താക്കോല് പിടിപ്പിക്കുന്നതുകൊണ്ട് യാതൊരു ഫലവുമില്ല. രണ്ടുമൂന്നു മിനിറ്റിനുള്ളില് ചലനങ്ങള് നില്ക്കുകയും രോഗി ശാന്തനാവുകയും ചെയ്യും.</p> <p style="text-align: justify; ">മൂര്ച്ചയുള്ള വസ്തുക്കള് സമീപത്തുണ്ടെങ്കില് എടുത്തു മാറ്റണം. രോഗിക്ക് പൂര്ണമായി ബോധം തെളിഞ്ഞശേഷമേ അയാളെ തനിയേ വിടാവൂ.<br />അഞ്ചോ പത്തോ മിനിട്ടിനുള്ളില് രോഗലക്ഷണങ്ങള് മാറിയില്ലെങ്കില് രോഗിയെ ആസ്പത്രിയിലെത്തിക്കണം.</p> <p style="text-align: justify; ">ഒരിക്കല് മാത്രമാണ് അപസ്മാരലക്ഷണങ്ങള് കണ്ടതെങ്കില്പ്പോലും വിദഗ്ദ്ധ പരിശോധന ആവശ്യമാണ്. മാസങ്ങളോ, ചിലപ്പോള് വര്ഷങ്ങളോ കഴിഞ്ഞായിരിക്കും വീണ്ടും അസുഖമുണ്ടാകുന്നത്.</p> <p style="text-align: justify; ">അത് അപകടകരമായ സാഹചര്യങ്ങളിലാണെങ്കില് (വണ്ടിയോടിക്കുമ്പോഴോ ഉയരത്ത് നില്ക്കുമ്പോഴോ നീന്തുമ്പോഴോ മറ്റോ) രോഗിയുടെ ജീവന്തന്നെ അപകടത്തിലാവും.</p> <p style="text-align: justify; ">ആദ്യമായി അപസ്മാരലക്ഷണം കാണുന്നത് 40 വയസോ അതിലധികമോ ആയിട്ടാണെങ്കില് ഉടന്തന്നെ വിദഗ്ദ്ധ ചികിത്സ തേടണം. ഈ പ്രായത്തില് അപസ്മാരലക്ഷണങ്ങള്ക്കു കാരണം മറ്റസുഖങ്ങളാവാനുള്ള സാധ്യത വളരെക്കൂടുതലാണ്.</p> <p style="text-align: justify; ">ഡോ. എന്. സുബ്രഹ്മണ്യന്</p> <p style="text-align: justify; "> </p> </div>