<div id="MiddleColumn_internal"> <h3>മോണവീക്കവും അനുബന്ധ രോഗങ്ങളും</h3> <p style="text-align: justify; ">പല്ലിനെ ഒരു ചെടിയായി കല്പന ചെയ്യുകയാണെങ്കില് , അതിനെ മണ്ണില് ഉറപ്പിച്ചുനിര്ത്തുന്ന വേര് പടലത്തിനോട് മോണയെ ഉപമിക്കാം.<br /> <br /> ദന്തശാസ്ത്രത്തില് പല്ലിനെ ചുറ്റി നില്ക്കുന്നതും അതിനെ താങ്ങി നിര്ത്തുന്നതുമായ അനുബന്ധഅവയവവ്യവസ്ഥയെ മൊത്തമായി<br /> പെരിയോഡോന്ഷ്യം (periodontium) എന്ന് വിളിക്കുന്നു.<br /> <br /> എന്നാല് ഈ മോണ എന്നത് നമ്മള് കാണുന്ന മാംസളമായ ഭാഗം മാത്രമല്ല , വേറെ ഭാഗങ്ങളുമുണ്ട്.<br /> അവ താഴെ പറയുന്നവയാണ്.<br /> <br /> 1. ജിന്ജൈവ(gingiva) - പുറമേ കാണുന്ന മോണ<br /> 2.പെരിയോഡോണ്ടല് ലിഗമെന്റ് (Periodontal ligament (PDL)<br /> 3.സിമന്റം (Cementum )<br /> 4.ആല്വിയോളാര് ബോണ് .(Alveolar Bone)<br /> <br /> താഴെ ക്കാണുന്ന ചിത്രത്തില് രേഖപെടുത്തിയിരിക്കുന്നത് കാണുക.</p> <p style="text-align: justify; "><img class="image-inline" src="../../../resolveuid/d46f5dc1700f4f75be6de8c904389084" /></p> <p style="text-align: justify; ">A = ഇനാമല്<br /> B = ഡെന്റ്റീന്<br /> C = ആല്വിയോളാര് ബോണ്<br /> D,E,F = ജിന്ജൈവ<br /> H,I,J,K = പെരിയോഡോണ്ടല് ലിഗമെന്റ്സ്/ഫൈബേഴ്സ്<span><br /> </span><span>മോണരോഗങ്ങള്</span><br /> പ്രധാനമായും മൂന്നു വിഭാഗങ്ങള് ആയി മോണയെ ബാധിക്കുന്ന രോഗങ്ങളെ തരംതിരിക്കാവുന്നതാണ് .<br /> <br /> 1.ജിന്ജിവൈറ്റിസ് (<strong>Gingivitis ) - </strong><strong>മോണവീക്കം</strong><strong> </strong><strong>പ്രാരംഭഘട്ടം</strong><strong> </strong><br /> <br /> 2.പെരിയോഡോണ്ടൈറ്റിസ് ( Periodontitis) - <strong>മോണവീക്കം</strong><strong> </strong><strong>ഗുരുതരഘട്ടം</strong><strong> </strong><br /> <strong><br /> </strong>3.മറ്റു രോഗങ്ങള് -</p> <ul style="text-align: justify; "> <li>gingival enlargement</li> <li>carcinoma (squamous cell)</li> <li>miscellaneous</li> </ul> <p style="text-align: justify; "><br /> <strong><span>1.</span></strong><strong><span>ജിന്ജിവൈറ്റിസ് (</span></strong><strong><span>Gingivitis ) - </span></strong><strong><span>മോണവീക്കം</span></strong><strong><span> </span></strong><strong><span>പ്രാരംഭഘട്ടം</span></strong><strong><span> </span></strong><br /> മുന്പുള്ള പാഠങ്ങളില് പറഞ്ഞതുപോലെ , പ്ലാക്ക് ആണ് ഇവിടെയും വില്ലന്.<br /> അതുകൊണ്ട് തന്നെ ഈ ജിന്ജിവൈറ്റിസ് നെ പ്ലാക്ക് ഇന്ട്യൂസ്ഡ് ജിന്ജിവൈറ്റിസ് (plaque induced gingivitis ) എന്നും വിളിക്കുന്നു.<br /> രോഗത്തിന്റെ തുടക്കം പ്ലാക്ക്/ബയോഫിലിം ന്റെ രൂപീകരണത്തോടെയാണ് . ഇതിന്റെ പ്രതിപ്രവര്ത്തനം എന്നവണ്ണം ശരീരത്തിന്റെ inflammation ആണ് ജിന്ജിവൈറ്റിസ് ആയി നമുക്ക് കാണുന്നത്.<br /> <br /> <strong><span>ലക്ഷണങ്ങള്</span></strong><strong><span> </span></strong><br /> 1.മോണ ചുവന്നു തുടുത്തതായി കാണപ്പെടുക</p> <p style="text-align: justify; "><img class="image-inline" src="../../../resolveuid/9db0c51622b04778ba62790a2f14d0cc" /></p> <table style="text-align: justify; "> <tbody> <tr> <td> <p style="text-align: left; ">പല്ലിന്റെ തൊട്ടുമുകളില് ചുവന്നിരിക്കുന്ന മോണ ശ്രദ്ധിക്കുക</p> </td> </tr> </tbody> </table> <table style="text-align: justify; "> <tbody> <tr> <td> <p align="center"><a href="http://4.bp.blogspot.com/-wPpDXqGXQ-U/VWfx0UhXUmI/AAAAAAAABdQ/KVxjsA9wYgE/s1600/DI_0910_09_28x.jpg"></a></p> </td> </tr> <tr> <td> <p style="text-align: left; "><img class="image-inline" src="../../../resolveuid/3d79b700f2dd4ffa9fce791aa3b65b3c" /></p> <p style="text-align: left; ">നല്ല ആരോഗ്യമുള്ള മോണ ഇതുപോലിരിക്കും. (normal ,healthy gingiva )</p> </td> </tr> </tbody> </table> <p style="text-align: justify; ">2. മോണ വീര്ത്തിരിക്കുക , അതേസമയം തൊടുമ്പോള് സോഫ്റ്റ് ആയി തോന്നുക , (soft,swollen gums )</p> <p style="text-align: justify; "><img class="image-inline" src="../../../resolveuid/a37b7f0a9bce48bc89b60ac55ed1d588" /></p> <p style="text-align: justify; ">2. മോണയില് നിന്ന് രക്തം വരുക <br /> ഈ ലക്ഷണത്തിനു മൂന്ന് അവസ്ഥകള് ഉണ്ട്<br /> a.No Bleeding on Probing<br /> b. Bleeding on Probing /brushing<br /> c. Spontaneous Bleeding<br /> <br /> a.No Bleeding on Probing<br /> ആരോഗ്യമുള്ള അവസ്ഥ. ബ്രഷ് ചെയ്യുമ്പോഴോ ദന്തവൈദ്യന് PROBE എന്ന ഉപകരണം ഉപയോഗിച്ച് പരിശോധിക്കുമ്പോഴോ രക്തം വരില്ല.<br /> <br /> b. Bleeding on Probing /brushing<br /> രോഗി ബ്രഷ് ചെയ്യുമ്പോഴോ ദന്തവൈദ്യന് PROBE എന്ന ഉപകരണം ഉപയോഗിച്ച് പരിശോധിക്കുമ്പോഴോ മോണയില് നിന്ന് രക്തം വരുന്ന അവസ്ഥ</p> <p style="text-align: justify; "><img class="image-inline" src="../../../resolveuid/5d20fcb3471449fab3fa056d959f9ab5" /></p> <p style="text-align: justify; ">c. Spontaneous Bleeding<br /> ചുമ്മായിരിക്കുമ്പോഴും മോണയില് നിന്ന് ചോര വരുന്ന അവസ്ഥ .<br /> <br /> <strong> a < b < c</strong> എന്നതാണ് തീവ്രതയുടെ സ്കെയില്.</p> <p style="text-align: justify; "><strong><span>പ്രതിരോധം </span></strong><strong><span>, </span></strong><strong><span>ചികിത്സ</span></strong><strong><span> </span></strong><br /> <strong><span><br /> </span></strong>പല്ല് എല്ലാ ദിവസവും രാവിലെയും രാത്രിയും വൃത്തിയായി ബ്രഷ് ചെയ്ത് സൂക്ഷിച്ചാല് തികച്ചും സാധാരണ അവസ്ഥയിലേക്ക് ഭേദമാക്കാവുന്ന (റിവേഴ്സ്ബള് ) അസുഖമാണ് ജിന്ജൈവൈറ്റിസ്.<br /> <br /> എന്നാല് , ശ്രദ്ധിക്കാതെ വിട്ടാല് ഇത് അടുത്ത സ്റ്റേജിലേക്ക് മുന്നേറും.<br /> <br /> <span>2.</span><strong><span>പെരിയോഡോണ്ടൈറ്റിസ്</span></strong><span> </span><span>(<strong> periodontitis</strong>) - </span><strong><span>മോണവീക്കം</span></strong><strong><span> </span></strong><strong><span>ഗുരുതരഘട്ടം</span></strong><strong><span> </span></strong><br /> ശ്രദ്ധിക്കാതെ പോകുന്ന ജിന്ജിവൈറ്റിസ് പെരിയോഡോണ്ടൈറ്റിസ് ആവുന്നു.<br /> ഈ ഘട്ടത്തില് പ്ലാക്കിലെ/ കാല്ക്കുലസിലെ അണുക്കള് മോണയുടെ ഉള്ളിലേക്കിറങ്ങി പല്ലിനെ ബലപ്പെടുത്തിനില്ക്കുന്ന ആല്വിയോളാര് ബോണ്-ന് ശോഷണം സംഭവിക്കുന്നു.<br /> ഇതിനെ ബോണ് ലോസ്സ് എന്ന് വിളിക്കുന്നു.ഇപ്രകാരം ബോണ് ലോസ്സ് ഉണ്ടാകുമ്പോള് രോഗിക്കുണ്ടാവുന്ന പ്രകടമായ ലക്ഷണം പല്ലിനു ഇളക്കം തട്ടുകയും അണുബാധ കാരണമുള്ള വേദനയും ആണ്.<br /> <br /> പെരിയോഡോണ്ടൈറ്റിസ് തന്നെ തീവ്രത അടിസ്ഥാനമാക്കി പലതരമാക്കാം.<br /> 1, ക്രോണിക് - ഏറെ നാളായി ഉള്ളത്<br /> 2, അഗ്ഗ്രസീവ് - മുഖ്യമായും യുവാക്കളെ ബാധിക്കുന്നത്.<br /> 3,നെക്രോട്ടൈസിംഗ് അള്സറെറ്റീവ് പെരിയോഡോണ്ടൈറ്റിസ് / ജിന്ജിവൈറ്റിസ്<br /> 4 , മറ്റു സിസ്റ്റമിക് അസുഖങ്ങളുമായി ബന്ധപെട്ടത് ( ഉദാ : പ്രമേഹം )<br /> 5, മോണപഴുപ്പ് (periodontal abscess)<br /> 6,എന്ഡോ - പെരിയോ ലീഷന്സ്<br /> <br /> 1,ക്രോണിക് പെരിയോഡോണ്ടൈറ്റിസ് വളരെ അപകടകരമായ ഒരസുഖമാണ്.<br /> മിക്കവാറും പ്രായമായവര്ക്കാണ് ഇത് കണ്ടുവരുന്നത്.<br /> <span>ലക്ഷണങ്ങള്</span><span> </span><br /> 1.ചുവന്നുതുടുത്ത , വീങ്ങിയ മോണ<br /> 2. വായ്നാറ്റം<br /> 3.മോണയിറക്കം - പല്ലിന്റെ വേര് പുറത്ത് കാണാവുന്ന അത്രയും ആഴത്തില്. ചിലപ്പോള് ഇവിടം പ്ലാക്ക് കൊണ്ട് മൂടിയിരിക്കും.<br /> 4 .ഇളക്കമുള്ള / ആട്ടമുള്ള പല്ലുകള് - മോണയിറക്കം മൂലം വേരുബലം പല്ലുകള് ടെ വേരുബലം പോകുന്നത് കൊണ്ട് .<br /> 5. പെരിയോഡോണ്ടല് പോക്കറ്റ്സ് - അണുബാധ കാരണം പല്ലിന്റെ വേരിനോട് ചേര്ന്നു ആഴത്തില് ഉണ്ടാവുന്ന ലീഷന്സ് .</p> <table style="text-align: justify; "> <tbody> <tr> <td> <p align="center"><a href="http://1.bp.blogspot.com/-l0PIrer92sk/VWgyNb_LLPI/AAAAAAAABds/s0r-9pwiVPg/s1600/03.jpg"></a></p> </td> </tr> <tr> <td> <p style="text-align: left; "><img class="image-inline" src="../../../resolveuid/61e45f9da9e04a94a7c92c96d55ce780" /></p> <p style="text-align: left; ">ക്രോണിക് പെരിയോഡോണ്ടൈറ്റിസ് ബാധിച്ച പല്ലുകള്</p> </td> </tr> </tbody> </table> <p style="text-align: justify; ">2.അഗ്രസീവ് പെരിയോഡോണ്ടൈറ്റിസ്<br /> പേരുപോലെ തന്നെ വളരെ പെട്ടെന്ന് പല്ലിനെ ചുറ്റി നില്ക്കുന്ന എല്ലിനു ശോഷണം വരുത്തി നാശം വിതയ്ക്കുന്ന ഈ ഇനം പ്രധാനമായും യുവാക്കളില് കണ്ടുവരുന്നതാണ് .<br /> ഇതില് തന്നെ ലോക്കലൈസ്ഡ് എന്നും ജനറലൈസ്ഡ് എന്നും വ്യത്യസ്തമായ രണ്ടിനങ്ങളുണ്ട് .<br /> <br /> 3,നെക്രോട്ടൈസിംഗ് അള്സറെറ്റീവ് ജിന്ജിവൈറ്റിസ് / പെരിയോഡോണ്ടൈറ്റിസ് <br /> വളരെ പെട്ടെന്ന് പിടിപ്പെടുകയും ഗുരുതരമായ രീതിയില് തന്നെ ആരോഗ്യത്തെ ബാധിക്കുന്ന ഇനമാണ് A.N.U.P /A.N.U.G . നല്ല വേദന അനുഭവപെടുന്ന മോണയില് നിന്ന് രക്തവും വരുന്നത് സാധാരണമാണ്. പല്ലിന്റെ ഇടയിലുള്ള പാപ്പില എന്ന ഭാഗത്ത് പഴുപ്പ് പോലെ കാണാറുള്ളതാണ് ക്ലാസിക് അടയാളം.<br /> ഒന്നാം ലോക മഹായുദ്ധകാലത്ത് , ഏറെ നാള് വൃത്തിഹീനമായ ട്രെഞ്ചുകളില് , കഠിനമായ മാനസികസമ്മര്ദ്ദത്തിനടിമപ്പെട്ടു യുദ്ധം ചെയ്തിരുന്ന പട്ടാളക്കാര്ക്കിടയില് സര്വ്വസാധാരണമായിരുന്നതിനാല് ഇതിനെ "<strong>ട്രെഞ്ച് മൌത്ത്</strong> " എന്ന് വിളിക്കാറുണ്ട്.<br /> HIV അണുബാധകൊണ്ടുണ്ടാവുന്ന AIDS ഇല് പ്രധാനമായി കാണപ്പെടുന്ന ഒരു അസുഖമാണ് ANUG/ANUP..<br /> <br /> 4. മറ്റു സിസ്റ്റമിക് അസുഖങ്ങളുമായി ബന്ധപെട്ടത് <br /> മനുഷ്യശരീരം ഒരു വമ്പന് ഫാക്ടറി പോലെയായിരിക്കുന്നതിനാല് , അതിന്റെ ഒരു ഭാഗത്ത് ഉണ്ടാകുന്ന പ്രക്രിയയിലെ തകരാറുകള് മറ്റു ഭാഗങ്ങളെയും ദോഷമായി ബാധിക്കും എന്ന് പറയുന്നതുപോലെ , പ്രമേഹം , രക്തസംബന്ധിയായ അസുഖങ്ങള് , ജനിതകരോഗങ്ങള് എന്നിവ മോണയുടെ ആരോഗ്യത്തെ ബാധിക്കാം/ അസുഖങ്ങള്ക്ക് കാരണമാവാം .<br /> <br /> 5.മോണപഴുപ്പ് (periodontal abscess) - എപ്രകാരമാണോ ദന്തക്ഷയത്തില് പല്ലിന്റെ വേരിനടിയില് പഴുപ്പ് വരുന്നത് അതേ പോലെ പല്ലിന്റെയും അതിനെ ചുറ്റിയിരിക്കുന്ന മോണയുടെയും ഇടയില് അണുബാധ ഉണ്ടാകുമ്പോള് periodontal abscess അഥവാ ലാറ്ററല് ആബ്സസ് എന്ന് വിളിക്കുന്നു .<br /> <br /> <strong><span>ചികിത്സ</span></strong><br /> A. സ്കെയിലിംഗ് - രോഗകാരണത്തെ ഉന്മൂലനം ചെയ്യുക എന്നതാണ് ഏതു ചികിത്സയുടെയും ആദ്യ ചുവട് എന്നതിനാല് പ്ലാക്ക്-നെ മാറ്റുക , അത് വഴി ബാക്ടീരിയല് ലോഡ് കുറയ്ക്കുക എന്ന ലക്ഷ്യത്തോടെയാണ് സ്കെയിലിംഗ് ചെയ്യുന്നത്.<br /> <br /> സ്കെയിലിംഗ് എന്നാല് പല്ല് ക്ലീന് ചെയ്യുക എന്നതിന്റെ ശാസ്ത്രീയമായ പ്രയോഗം തന്നെയാണ്.<br /> <br /> സ്കെയിലിംഗ് രണ്ട് - മൂന്ന് രീതിയില് ചെയ്യാം<br /> 1. <i>ഹാന്ഡ് സ്കെയിലിംഗ്</i><i> </i>- പല്ലില് പറ്റി പ്പിടിച്ചിരിക്കുന്ന അഴുക്ക്/കറ/പ്ലാക്ക് അതില് നിന്ന് അടര്ത്തിമാറ്റാന് പ്രത്യേകം രൂപപ്പെടുത്തിഎടുത്തിരിക്കുന്ന ഉപകരണങ്ങള് ഉപയോഗിച്ച് .</p> <table style="text-align: justify; "> <tbody> <tr> <td> <p align="center"><a href="http://4.bp.blogspot.com/-rlAVjmBfzI8/VWhg-_SNw_I/AAAAAAAABeg/mvNovl3b9ao/s1600/dental-scaling.png"></a></p> </td> </tr> <tr> <td> <p style="text-align: left; "><img class="image-inline" src="../../../resolveuid/dcb7edb8e712468f80a01814a767d809" /> <img class="image-inline" src="../../../resolveuid/92f92fd4fd3d4233859e0734ae796a5d" /> <span>പ്ലാക്ക് നീക്കം ചെയ്യുന്നു</span></p> <p style="text-align: left; ">മോണയുടെ താഴെയുള്ള</p> <p style="text-align: left; ">പ്ലാക്ക് നീക്കം ചെയ്യുന്നു</p> </td> </tr> </tbody> </table> <table style="text-align: justify; "> <tbody> <tr> <td> <p align="center"><a href="http://4.bp.blogspot.com/-unr6tnZq-Ek/VWhg9PafwHI/AAAAAAAABeQ/yjVsuWJppN0/s1600/dental-scaling.jpg"></a></p> </td> </tr> <tr> <td> <p style="text-align: left; "><img class="image-inline" src="../../../resolveuid/1ac7b698be644f13b7c499cfba1176af" /></p> <p style="text-align: left; "><span style="text-align: justify; ">പല്ലിന്റെ പ്രതലത്തില് നിന്ന് കറ നീക്കം ചെയ്യുന്നു.</span></p> </td> </tr> </tbody> </table> <table style="text-align: justify; "> <tbody> <tr> <td> <p align="center"><a href="http://4.bp.blogspot.com/-gGikDdQdydQ/VWhfSpcpQdI/AAAAAAAABeE/MpxaPHnro2c/s1600/Manual-scaling-of-cleaning-teeth-oral-dental-tools-kits.jpg"></a></p> </td> </tr> <tr> <td> <p style="text-align: left; "><img class="image-inline" src="../../../resolveuid/d9a5c8241f0140c2b9a7ec9e685c6011" /></p> <p style="text-align: left; ">ഹാന്ഡ് സ്കെയിലിംഗ് ന് ഉപയോഗിക്കുന്ന ഉപകരണങ്ങള്</p> </td> </tr> </tbody> </table> <p style="text-align: justify; ">2. <i>അള്ട്രാസോണിക്ക് സ്കേലര് ഉപയോഗിച്ച്</i><br /> ശബ്ദത്തേക്കാള് ഫ്രീക്വന്സിയില് അതിവേഗം കമ്പനം ചെയ്യുന്ന ഒരു മെറ്റല് ടിപ് കൊണ്ട് പ്ലാക്കിലേക്ക് തൊടുമ്പോള് തീവ്രവേഗകമ്പനത്തിന്റെ ഫലമായി പല്ലിന്റെ പ്രതലത്തില് നിന്ന് പ്ലാക്ക് ഇളകുന്നു.<br /> <i>അള്ട്രാ സോണിക്ക് സ്കേലര് മെഷീന് </i></p> <p style="text-align: justify; "><i><img class="image-inline" src="../../../resolveuid/f83d07fc1cea41fc8062f5681a611c3f" /></i></p> <p style="text-align: justify; "><i><img class="image-inline" src="../../../resolveuid/09db4919bb7944cdb8a85779e5a7dfbc" /> <img class="image-inline" src="../../../resolveuid/29b7c46279ea40b193cb0e7a54fa4435" /></i></p> <p style="text-align: justify; ">അള്ട്രാസോണിക്ക് സ്കേലര് ഉപയോഗിച്ച് പല്ല് ക്ലീന് ചെയ്യുന്നു</p> <p style="text-align: justify; ">3. <i>ലേസര് ഉപയോഗിച്ച് ഉള്ള സ്കെയിലിംഗ്</i><i> </i><br /> ഇത് മുകളില്പ്പറഞ്ഞ രീതികളുടെ ഒപ്പമോ പകരമോ ആയി ഉപയോഗിക്കുന്ന ഒന്നാണ്. ലേസറിന്റെ ഉപയോഗത്താല് രോഗബാധിതമായ മോണ 100 % അണുവിമുക്തമാക്കപ്പെടും എന്നാണ് പറയപ്പെടുന്നത്. Nd- YAG ലേസര് ആണ് ഉപയോഗിച്ചു വരുന്നത്</p> <p style="text-align: justify; "><img class="image-inline" src="../../../resolveuid/5d187e0dd25243ca90fc033afaf00bc8" /> <img class="image-inline" src="../../../resolveuid/64a1251520c64ab9bcdf52fbeded556d" /></p> <p style="text-align: justify; ">സ്കെയിലിംഗ് ന് മുന്പും ശേഷവും ഉള്ള വ്യത്യാസം ശ്രദ്ധിക്കുക , താഴെയുള്ള ചിത്രത്തില്</p> <p style="text-align: justify; "><img class="image-inline" src="../../../resolveuid/9c770c25c80e459ea4e9e27f646e2951" /></p> <p style="text-align: justify; ">B. റൂട്ട് പ്ലേനിംഗ്</p> <p style="text-align: justify; ">ഗുരുതരമായ അവസ്ഥയില് മോണയ്ക് താഴെയുള്ള വേരിലും പ്ലാക്ക് പറ്റി പിടിച്ചിരുന്നു കുഴപ്പങ്ങള് ഉണ്ടാക്കുന്നു. ഈ പ്ലാക്ക് നെ സബ് ജിഞ്ചിവല് പ്ലാക്ക് എന്ന് വിളിക്കുന്നു.</p> <p style="text-align: justify; ">ഇവന് ഒരു സൈലന്റ് കില്ലര് ആണ്. ഒറ്റനോട്ടത്തില് കാണാന് പോലുമാകാത്ത സബ് ജിഞ്ചിവല് പ്ലാക്ക് വേരിന്റെ പ്രതലത്തില് നിന്ന് നീക്കം ചെയ്യുന്ന പ്രക്രിയയെ ROOT PLANING എന്ന് വിളിക്കുന്നു. ഇത് പ്രത്യേക തരം ഹാന്ഡ് സ്കെയിലിംഗ് ഉപകരണങ്ങള് കൊണ്ടോ അല്ലെങ്കില് അള്ട്രാസോണിക്ക് സ്കേലര് ഉപയോഗിച്ചോ ലേസര് കൊണ്ടോ ചെയ്യാം.</p> <p style="text-align: justify; ">c. പെരിയോഡോണ്ടല് സര്ജറി - മോണവീക്കം അതീവ ഗുരുതരമായാല് ചിലപ്പോള് സ്കെയിലിംഗ് / റൂട്ട് പ്ലേനിംഗ് എന്നിവയൊക്കെ ചെയ്താലും മോണയില് നശിച്ചു പോയ ലിഗമെന്റ്റുകളോ അസ്ഥിയോ തിരിച്ചുവരുന്നില്ല. അങ്ങനെ ഉള്ള അവസ്ഥയില് ചില പ്രത്യേക ശസ്ത്രക്രിയകളിലൂടെ മോണയുടെ ആരോഗ്യം വീണ്ടെടുക്കാന് കഴിയും . (വളരെ വിശാലമായ ഒരു വിഷയമായതിനാല് അതിനെക്കുറിച്ച് പിന്നീടു പറയാം )</p> <p style="text-align: justify; "><strong><span> PREVENTION IS BETTER THAN CURE.</span></strong><br /> <br /> എപ്പോഴും പറയാറുള്ളത് പോലെ പ്രതിരോധമാണ് ഏറ്റവും നല്ല ചികിത്സ എന്നതിനാല് ,<br /> പ്ലാക്ക് അപകടകരമായി തീരുന്നതില് നിന്നും പല്ലിനെ രക്ഷിചെടുക്കുക എന്നത് എങ്ങനെ എന്ന് നോക്കാം .<br /> <br /> പ്ലാക്ക് രൂപീകരണം തടയുക എന്നതിന് പ്ലാക്ക് ഉണ്ടോ എന്നറിയണം. എന്നാല് നമ്മുടെ കണ്ണില്പെടുമ്പോഴേക്കും പ്ലാക്ക് ചുറ്റുപാടുള്ള സ്രോതസ്സുകളില് നിന്നെല്ലാം കാല്ഷ്യം ആഗിരണം ചെയ്ത് കാല്ക്കുലസ് ആയി മാറിക്കഴിഞ്ഞിരിക്കും. ഈ കാല്ക്കുലസ് ആകട്ടെ, പല്ലിനോട് ദൃഢമായി ഒട്ടിപ്പിടിച്ച് നില്ക്കുന്ന ഒന്നാണ്. (ന്ന്വെച്ചാല് എത്ര അമര്ത്തി ബ്രഷ് ചെയ്താലും പോവില്ല ! )<br /> <br /> പ്ലാക്ക് ഉണ്ടായിത്തുടങ്ങുമ്പോള് അണുക്കളുടെയും ഭക്ഷണാവശിഷ്ടങ്ങളുടെയും വളരെ നേര്ത്ത സുതാര്യമായ ഒരു പടലമായിട്ടാണ് . അതാകട്ടെ , നഗ്നനേത്രങ്ങള്ക്ക് ഗോചരവുമല്ല . അതിനാല് പ്ലാക്കിനെ കാണിച്ചുതരാന് ഉപയോഗിക്കാവുന്ന ചില വര്ണ്ണലായനികള് (എറിത്രോസിന് , ഫ്ലൂറസീന് ) ഉപയോഗിക്കാം . ഇവയെ <i>ഡിസ്ക്ലോസിംഗ് സൊല്യൂഷന്സ് </i><i> </i>എന്ന് വിളിക്കുന്നു</p> <p style="text-align: justify; "><a href="http://1.bp.blogspot.com/-GhtcRnKofjM/VWhpoJD42-I/AAAAAAAABf0/CVxl3GtNwY4/s1600/1_38764_FS.jpg"></a><img class="image-inline" src="../../../resolveuid/e3ec8b400a0747af9544ebdfd6a046b1" />ഈ ലായനികള് (ചിലവ ടാബ്ലെറ്റ് ആയും ലഭ്യമാണ് ) കുറച്ച് എടുത്ത് വാ കഴുകുകയോ ഒരു പഞ്ഞിയില് ലായനി മുക്കി എടുത്ത് പല്ലുകളുടെ പ്രതലം തുടയ്ക്കുകയോ ചെയ്യാം .<br /> <br /> ടാബ്ലെറ്റ് ആണെങ്കില് , അത് ചവച്ചരച്ച ശേഷം വെള്ളം കൊണ്ട് വാ കഴുകിയാല് മതി .</p> <p style="text-align: justify; "><img class="image-inline" src="../../../resolveuid/20687703b6e044e1bb4cd3bf52ed509e" /></p> <p style="text-align: justify; "><a href="http://2.bp.blogspot.com/-5ULZU5cXFfY/VWhpNU5UuAI/AAAAAAAABfs/P13jnJESS5E/s1600/s-charlson.jpg"></a></p> <p style="text-align: justify; ">ശേഷം കണ്ണാടിയില് നോക്കിയാല് പ്ലാക്ക് ഉള്ള ഭാഗം ബാക്കിയുള്ള പ്രതലത്തെ അപേക്ഷിച്ച് കൂടുതല് നിറം പിടിച്ചിരിക്കുന്നതായി കാണാം.</p> <p style="text-align: justify; ">ഈ ചിത്രങ്ങളില് പിങ്ക് നിറം കൂടുതലായി പിടിച്ചിരിക്കുന്നതൊക്കെ പ്ലാക്ക് ആണ്</p> <p style="text-align: justify; "><img class="image-inline" src="../../../resolveuid/7ef9687dfd3c4aadb1eb08973e8c7ed4" /></p> <p style="text-align: justify; ">പ്ലാക്ക് ഉണ്ടെന്നു ബോധ്യപെട്ടാല് പിന്നെ ചെയ്യാവുന്ന കാര്യം ബ്രഷിംഗ് നന്നായി ചെയ്യുക എന്നതാണ് .<br /> <br /> രാവിലെയും <strong>രാത്രിയും</strong> ബ്രഷ് ചെയ്യുന്നതാണ് ഉത്തമം.<br /> <br /> ഏറ്റവും പ്രയോജനപ്രദമായ ബ്രഷിംഗ് ഏതാണെന്ന് ചോദിച്ചാല്, ബാസ്, സ്റ്റില്മാന് മോഡിഫൈഡ് ബാസ് എന്നിങ്ങനെ ഒരു പാട് ടെക്നിക്കുകള് ഉണ്ട്.<br /> ഒരെണ്ണം താഴെക്കൊടുക്കുന്നു.</p> <p style="text-align: justify; "><strong><img class="image-inline" src="../../../resolveuid/f02bea43002f4725942857e49608f3e8" /> <img class="image-inline" src="../../../resolveuid/71c2714495064698990b3bd907817dc6" /><br /> </strong><strong>എത്ര നേരം ബ്രഷ് ചെയ്യുന്നു എന്നതോ എത്ര ബലത്തില് ചെയ്യുന്നു എന്നതോ ഒന്നും പ്രധാനമല്ല.</strong><br /> ശരിയായ രീതി ആണോ എന്നത് മാത്രം ശ്രദ്ധിക്കുക.<br /> <br /> ബ്രഷിംഗ് എല്ലാം കൃത്യമായാലും ചില ആളുകളില് പ്ലാക്ക് ക്രമാതീതമായി വരുന്നത് കാണാറുണ്ട്.ഇത് അപൂര്വമാണെങ്കിലും , അസാധാരണമല്ല. ഇത്തരം ആളുകളില് , ഒന്നുകില് ഉമിനീരിലെ കാല്ഷ്യം അളവ് സാധാരണ കാണുന്നതിനെക്കാള് കൂടുതല് ആവാം . അല്ലെങ്കില് പല്ലുകളുടെ നില്പ്പില് അസാധാരണമായ ക്രമരാഹിത്യങ്ങള് ഉണ്ടാവാം.<br /> അങ്ങനെയുള്ളവര് മൂന്നുമാസത്തിലൊരിക്കല് ഒരു ദന്തവൈദ്യന്റെ സഹായം തേടുന്നതായിരിക്കും കൂടുതല് അഭികാമ്യം.<strong><br /> </strong><strong>ഫ്ലോസ്സിംഗ്</strong><strong> </strong><br /> ---------------<br /> ഗ്രാമങ്ങളില് ഒന്നും അത്ര പ്രചാരമില്ലാത്ത ദന്തശുചീകരണരീതിയാണിത്. ബ്രഷ് ഉപയോഗിച്ചാലും വൃത്തിയാക്കാന് പറ്റാത്ത ഇടങ്ങള് ഉണ്ട്. ഉദാ : രണ്ട് പല്ലുകളുടെ ഇടയിലെ ഭാഗം.<br /> അങ്ങനെയുള്ള പ്രദേശങ്ങളില് നിന്ന് പ്ലാക്ക് നീക്കം ചെയ്യാനുള്ള ഉപാധിയാണ് ഫ്ലോസ്.<br /> <br /> ഇത് തീരെ കനവും വീതിയും കുറഞ്ഞ ഒരു പ്ലാസ്റ്റിക് നാടയാണ് . ഇരുകൈകളാലും രണ്ടറ്റങ്ങള് പിടിച്ച് പല്ലുകളുടെ ഇടയിലെ പ്രദേശത്തിലേക്ക് ഫ്ലോസ് കടത്തി വേണം പല്ല് വൃത്തിയാക്കാന്</p> <p style="text-align: justify; "><img class="image-inline" src="../../../resolveuid/b81b33e70e404447870580f7a14fc5b4" /> <img class="image-inline" src="../../../resolveuid/98d25de0a12b4d998adb5213edd2b437" /></p> <h3 style="text-align: justify; ">സാധാരണ കണ്ടുവരുന്ന ദന്തരോഗങ്ങള് : ദന്തക്ഷയം</h3> <p style="text-align: justify; ">പല്ലുകളുടെ രൂപഘടനയെക്കുറിച്ച് അത്യാവശ്യം അറിഞ്ഞിരിക്കേണ്ട കാര്യങ്ങള് നമ്മള് പഠിച്ചതാണല്ലോ .ഇനി സാധാരണയായി കണ്ടുവരുന്ന ദന്തരോഗങ്ങളെ പരിചയപ്പെടാം.</p> <ol style="text-align: justify; "> <li>ദന്തക്ഷയം </li> <li>മോണവീക്കവും അനുബന്ധ അസുഖങ്ങളും </li> <li>അപകടങ്ങള് കൊണ്ടുണ്ടാവുന്ന പരിക്കുകള് </li> <li> ഓറല് ക്യാന്സര് </li> <li>മറ്റു രോഗങ്ങള്</li> </ol> <p style="text-align: justify; "><strong><span>1. </span></strong><strong><span>ദന്തക്ഷയം</span></strong></p> <p style="text-align: justify; ">എല്ലാവര്ക്കും പരിചയമുള്ള ഒന്നാണ് പല്ലിലെ പോട് അഥവാ ഡെന്റല് കേരീസ് (Dental Caries)</p> <p style="text-align: justify; ">മിക്കവാറും പേര് അതുകൊണ്ട് ജീവിതത്തിലൊരിക്കലെങ്കിലും ബുദ്ധിമുട്ടിയിട്ടുള്ളവരും ആയിരിക്കും.</p> <p style="text-align: justify; ">ഇനി നമ്മള് പലതരം ദന്തക്ഷയങ്ങളെ അറിയാന് ശ്രമിക്കുകയാണ്.</p> <p style="text-align: justify; ">കേട് പല്ലിന്റെ ഏതു ഭാഗത്ത് വരെ / എത്ര ആഴത്തില് എത്തി എന്നതിനെ ആസ്പദമാക്കി ദന്തക്ഷയത്തെ മൂന്നായി തരം തിരിക്കാം</p> <p style="text-align: justify; "><strong><span>1. </span></strong><strong><span>ഇനാമല് കേരീസ്</span></strong><strong><span> </span></strong></p> <p style="text-align: justify; ">പല്ലിന്റെ ഏറ്റവും പുറമെയുള്ള ഇനാമല് മാത്രം ബാധിച്ചിരിക്കുന്ന തരം.</p> <p style="text-align: justify; "><img class="image-inline" src="../../../resolveuid/218f3271f984463783f27aed90c7775b" /></p> <table style="text-align: justify; "> <tbody> <tr> <td> <p align="center"><a href="http://2.bp.blogspot.com/-NQo0zWviD2k/VT0l8VUW2HI/AAAAAAAABME/HDjClVlBgtE/s1600/dental-caries-tooth-decay.jpg"></a></p> </td> </tr> <tr> <td> <p align="center">A ) ENAMEL CARIES B) DENTINAL CARIES C) PULP EXPOSURE</p> </td> </tr> </tbody> </table> <p style="text-align: justify; ">ഇനാമല് കേരീസ് ദന്തക്ഷയത്തിന്റെ തുടക്കമാണ് .</p> <p style="text-align: justify; "><img class="image-inline" src="../../../resolveuid/1309661e0e0e40cd8da0fa71af6dac9d" /></p> <p style="text-align: justify; ">നമ്മള് കഴിക്കുന്ന ഭക്ഷണം/ അവശിഷ്ടങ്ങള് പല്ലിന്റെ ചവച്ചരയ്ക്കുന്ന പ്രതലത്തിലെ വളരെ ചെറിയ മടക്കുകളില് (grooves ) ഇല് തങ്ങിനിന്നാല് , വായ്ക്കകത്തെ അണുക്കള്- പ്രധാനമായും സ്ട്രെപ്റ്റോകോക്കസ് മ്യൂട്ടന്സ് ( Streptococcus mutans ) എന്ന വിരുതന് - അവയെ (ഫെര്മന്റേഷന് വഴി ) ഭക്ഷണമാക്കി വംശവര്ദ്ധനവ് നടത്തുന്നു . ഈ പ്രക്രിയയില് വളരെയധികം ലാക്റ്റിക് ആസിഡ് ഉത്പാദിപ്പിക്കപ്പെടുന്നു.</p> <p style="text-align: justify; "><img class="image-inline" src="../../../resolveuid/f00fba640da1407a8e02d261bb0a4e2e" /></p> <table style="text-align: justify; "> <tbody> <tr> <td> <p align="center"><a href="http://1.bp.blogspot.com/-zqf2bZqDU84/VT2ilUO455I/AAAAAAAABMg/yVHBqE72-H0/s1600/Streptococcus_mutans_01.jpg"></a></p> </td> </tr> <tr> <td> <p style="text-align: left; ">സ്ട്രെപ്റ്റോകോക്കസ് മ്യൂട്ടന്സ് - മൈക്രോസ്കോപ്പ് ദൃശ്യം</p> </td> </tr> </tbody> </table> <p style="text-align: justify; ">ഈ അമ്ലങ്ങള് ഇനാമലുമായി സമ്പര്ക്കത്തില് വരുമ്പോള് അതില് നിന്ന് വലിയ തോതില് ധാതുശോഷണം(Demineralization ) സംഭവിക്കുന്നു .ഇത് റിവേഴ്സ് ബള് ആയ ഒരു പ്രക്രിയ ആണ്.</p> <p style="text-align: justify; ">അവസരം കിട്ടുന്നിടത്തെല്ലാം കോളനിവത്കരണം നടത്തുന്ന ബാക്ടീരിയകള് കൂട്ടമായി പല്ലിന്റെ ചുറ്റിലും മോണയുടെ പരിസരപ്രദേശങ്ങളിലും ഒരു ക്രീമി പേസ്റ്റ് പോലെ ചെറിയ അളവില് കാണപ്പെടുന്നതിനെ ദന്തവൈദ്യന്മാര് " പ്ലാക്ക് " (PLAQUE) എന്ന് വിളിക്കുന്നു.</p> <p style="text-align: justify; "><img class="image-inline" src="../../../resolveuid/5b393c1840f544a99d6b64cb78defe78" /></p> <table style="text-align: justify; "> <tbody> <tr> <td> <p align="center"><a href="http://4.bp.blogspot.com/-rrdAe1kdKdo/VT2k_0QkHmI/AAAAAAAABMs/iRqrLw0E6rw/s1600/Dental_Plaque001.jpg"></a></p> </td> </tr> <tr> <td> <p align="center">പ്ലാക്ക് / PLAQUE</p> </td> </tr> </tbody> </table> <p style="text-align: justify; ">കണ്ടാല് തികച്ചും നിരുപദ്രവകരമെന്ന് തോന്നുന്ന പ്ലാക്ക് യഥാര്ത്ഥത്തില് അപകടകാരിയാണ്.</p> <p style="text-align: justify; ">അത് അണുക്കള്ക്ക് വളരാന് പറ്റിയ സാഹചര്യം ഒരുക്കുന്നു. നാക്കിന്റെ ശുചീകരണചലനങ്ങളില് നിന്ന് വലിയ ഒരളവു വരെ അതവയുടെ കോളനികള്ക്ക് പല്ലിനോട് ചേര്ന്നു തന്നെ പെറ്റുപെരുകാന് അവസരം നല്കുന്നു.<br /> <br /> ഈ പ്ലാക്ക് ആണ് ക്രമേണ ഉമിനീരിലും ഭക്ഷണത്തിലും മറ്റുമുള്ള കാല്സിയം ആഗിരണം ചെയ്ത് കട്ടിയായി പല്ലിനോട് ഒട്ടിപ്പിടിച്ചിരിക്കുന്ന "കാല്ക്കുലസ്" (CALCULUS) ആയി രൂപാന്തരം പ്രാപിക്കുന്നത്.</p> <table style="text-align: justify; "> <tbody> <tr> <td> <p align="center"><a href="http://1.bp.blogspot.com/-s5ulGDwCCEo/VUyJyFyY5QI/AAAAAAAABNI/9yMcYIroqZ8/s1600/800px-MandibularAnteriorCalculus.JPG"></a></p> </td> </tr> <tr> <td> <p align="center"><img class="image-inline" src="../../../resolveuid/edc13065c11c4b4985b8ad5020a97f44" /></p> <p align="center">കാല്ക്കുലസ</p> </td> </tr> </tbody> </table> <p style="text-align: justify; "><br /> കാല്ക്കുലസ് ന്റെ പ്രതലം റഫ് ആയിരിക്കുന്നതിനാല് അത് വീണ്ടും പ്ലാക്ക് അടിഞ്ഞുകൂടാന് കാരണമാവുകയും ചെയ്യുന്നു. അങ്ങനെ കാല്ക്കുലസ് അട്ടിയട്ടിയായി പല്ല് മോണയോട് ചേരുന്ന ഭാഗത്തും , അണപ്പല്ലുകളുടെ ചവയ്ക്കല് പ്രതലത്തിലും (OCCLUSAL surface/chewing surface ) അസാധാരണമായ അളവില് കൂടുന്നു.<br /> <br /> ഇതേ സമയം പ്ലാക്ക് / കാല്ക്കുലസ് ഒട്ടിപ്പിടിച്ചിരിക്കുന്നതിന് താഴെ പല്ലിനോട് ചേര്ന്നു അണുക്കളുടെ കോളനി താഴേക്ക് വ്യാപിക്കുകയും ദന്തക്ഷയം കൂടുതല് ആഴമുള്ളതാവുകയും ചെയ്യുന്നു.<br /> <br /> ഇനാമല് അജൈവമായത് കൊണ്ട് ഇനാമല് കേരീസ് പ്രത്യക്ഷ തലത്തില് രോഗിക്ക് ( പുളിപ്പ് , വേദന , നീര്ക്കെട്ട് ഇത്യാദി )കുഴപ്പമൊന്നും ഉണ്ടാക്കുന്നില്ലെങ്കിലും ഒരു ഇര്റിവേഴ്സ്ബള് പ്രക്രിയയുടെ തുടക്കം എന്ന നിലക്ക് അത്യന്തം പ്രധാനമാണ്.<br /> <br /> ഏറ്റവും എളുപ്പത്തില് / ചെലവ് കുറവില് ചികിത്സിച്ച് ഭേദമാക്കാവുന്നവ ഇത്തരം ഏര്ളി സ്റ്റേജ് കേരീസ് ആണ് .</p> <p style="text-align: justify; "><strong><span> 2. </span></strong><strong><span>ഡെന്ടിനല് കേരീസ്</span></strong><br /> <br /> ദന്തക്ഷയം പല്ലിന്റെ രണ്ടാം പാളിയായ ഡെന്റ്റീനില് എത്തിയെങ്കില് ആ സ്റ്റേജ് നെ ഡെന്റ്റിനല് കേരീസ് എന്ന് വിളിക്കുന്നു.ഈ സ്റ്റേജ് എത്തുമ്പോള് മാത്രമാണ് രോഗിക്ക് ദന്തക്ഷയം മൂലമുള്ള പ്രശ്നങ്ങള് ( പുളിപ്പ് , വേദന ഇത്യാദി ) അനുഭവപെട്ടു തുടങ്ങുന്നത്.<br /> ചികിത്സ അത്യാവശ്യമായി വരുന്ന ഘട്ടമാണിത്.<br /> ഇവിടെ വേദനയെ അവഗണിക്കുകയോ സ്വയം ചികിത്സ ( അടുത്തുള്ള മെഡിക്കല് ഷോപ്പില് നിന്ന് വേദനയ്ക്കുള്ള മരുന്ന് വാങ്ങി കഴിക്കല് , ആള്ട്ടര്നേറ്റീവ് മരുന്നുകള് ) ചെയ്ത് താല്കാലിക രക്ഷ നേടുകയോ ചെയ്യുന്നത് അപകടമാണ്. കാരണം ദന്തക്ഷയം ഈ ലേയറിലൂടെ താഴെയുള്ള പള്പ്പിന്റെ അടുത്തെത്തുന്തോറും ചികിത്സയുടെ രീതി , ചെലവ് ഒക്കെ മാറും.<br /> <br /> പുളിപ്പ് /വേദന എന്നിവ അനുഭവപ്പെട്ടാല് ഉടനെ ഒരു ദന്തവൈദ്യനെ കണ്ടു പരിശോധിക്കുക എന്നതാണ് ഏറ്റവും ഫലവത്തായ / പ്രായോഗികമായ കാര്യം.<br /> <br /> <strong><span>3 . </span></strong><strong><span>പള്പ്പ് എക്സ്പോഷര് -</span></strong><br /> <br /> ദന്തക്ഷയം താരതമ്യേന വലി പ്പമുള്ള ഡെന്റ്റീന് എന്ന പാളിയും കടന്നു താഴോട്ട് വ്യാപിച്ചു ഒടുവില് പല്ലിന്റെ മാംസളഭാഗമായ പള്പ്പില് എത്തുന്നതോടെ പ്രശ്നം ഗുരുതരമാവുന്നു. ഒന്നാം പാഠത്തില് പറഞ്ഞതുപോലെ അണുക്കളുടെ പ്രത്യുല്പാദനപ്രക്രിയയ്ക്കുതകുന്ന സാഹചര്യങ്ങള് പള്പ്പില് ഉള്ളതുകൊണ്ടുള്ള എല്ലാ ബുദ്ധിമുട്ടുകളും രോഗി അനുഭവിക്കേണ്ടി വരുന്നു.<br /> അതികഠിനമായ വേദന ( രാത്രിസമയങ്ങളില് കൂടുതലാവുന്നത് ) കേട് പള്പ്പില് എത്തി എന്നതിന്റെ അപായസൈറന് ആയി കണക്കാക്കാം .<br /> രോഗിയുടെ പ്രതിരോധശേഷി അനുസരിച്ച് രോഗിയ്ക്ക് ഉണ്ടാകുന്ന ബുദ്ധിമുട്ടുകള് പലതാകാം.<br /> മികച്ച പ്രതിരോധവ്യവസ്ഥ ഉള്ള ആളുകളില് പള്പ്പ് എക്സ്പോഷര് ഉണ്ടായാല് ഉടന് ശരീരത്തിന്റെ പ്രതിപ്രവര്ത്തനം ഉണ്ടാവുകയും അണുക്കള് ഏകദേശം ഉന്മൂലനം ചെയ്യപെടുകയും ചെയ്യാം.<br /> <br /> എന്നാല് തുടര്ച്ചയായ അധിനിവേശ കോളനികള് എത്തുന്നതോടെ യുദ്ധം രൂക്ഷമാവുകയും ശരീരത്തിന്റെ ഇന്ഫ്ലമേറ്ററി പദാര്ഥങ്ങളുടെ സാന്നിദ്ധ്യം വര്ദ്ധിക്കുമ്പോള് അത് നീരായി പുറത്ത് ദൃശ്യമാവുകയും ചെയ്യും. അണുക്കളുടെ വര്ദ്ധനവ് /മരണം അവയുടെ ടോക്സിനുകള് പുറത്ത് വരാന് കാരണമാവുമ്പോള് , അത് ചലമായി മാറുന്നു. ഇവയെല്ലാം കൂടെ പല്ലിന്റെ വേരിനടിയില് കുമിഞ്ഞുകൂടി അകത്തെ മര്ദ്ദം വര്ദ്ധിക്കുമ്പോള് വേദന അസഹ്യമാവുന്നു. ചലം ഒരു പരിധിയില് കൂടുമ്പോള് അത് പുറത്തുപോകുവാന് ഏറ്റവും എളുപ്പമായ കോശകലകളെ ഭേദിച്ച് പുറത്തേക്ക് പൊട്ടിയൊഴുകാം .<br /><br /> ഈ യുദ്ധം ഒരു ഇക്വിലിബ്രിയം ആയി മാറിയേക്കാം . അങ്ങനെ സംഭവിച്ചാല് , പല്ലിന്റെ വേരിനടിയില് ഒരു പെരി-അപ്പിക്കല് ഗ്രാനുലോമ ( അണുക്കള് v/s വെളുത്ത രക്താണുക്കള് ടെ യുദ്ധക്കളം ) രൂപപ്പെടുകയും പള്പ്പ് ക്രമേണ ക്രമേണ നിര്ജീവമാകുകയും ചെയ്യുന്നു.<br /> <br /> പള്പ്പ് എക്സ്പോഷര് വന്ന പല്ലിനെ രക്ഷിചെടുക്കുക ബുദ്ധിമുട്ടാണ്.<br /> പള്പ്പ് കാപ്പിംഗ് എന്ന ചികിത്സ നിലവിലുണ്ടെങ്കിലും അതെത്രത്തോളം ഫലപ്രദമാണ് എന്ന കാര്യം തര്ക്കവിഷയമാണ്.<span><br /> </span><strong><span>ചികിത്സ</span></strong><strong><span> </span></strong><br /> <br /> ഇനാമല് , ഡെന്റ്റിനല് കേരീസ് ആദ്യം പറഞ്ഞത് പോലെ തന്നെ ചികിത്സിക്കാന് താരതമ്യേന എളുപ്പവും ചെലവ് കുറവുമാണ്.<br /> പോടടയ്ക്കുവാന് ഉപയോഗിക്കുന്ന വിവിധ തരം ഡെന്റല് മെറ്റീരിയല്സ് ഏതൊക്കെയാണ് എന്ന് താഴെകൊടുക്കുന്നു.<br /> <br /> 1. <strong><span>അമാല്ഗം ഫില്ലിംഗ് / </span></strong><strong><span>A .F </span></strong></p> <p style="text-align: justify; "><a href="http://4.bp.blogspot.com/-SDjMXcrOHUo/VUzjJL3v4iI/AAAAAAAABNg/V3EUviznd4c/s1600/silverfillings.png"></a></p> <p style="text-align: justify; "> </p> <table style="text-align: justify; "> <tbody> <tr> <td> <p align="center"><a href="http://1.bp.blogspot.com/-oCqV_uGO8VQ/VUzjHClyWRI/AAAAAAAABNY/HEcQVVpi94s/s1600/amalgam.jpg"></a></p> </td> </tr> <tr> <td> <p align="center"> </p> <p align="center"><img class="image-inline" src="../../../resolveuid/81b27eb7fb2049ce94ce190f4ac6501b" /> <img class="image-inline" src="../../../resolveuid/f45acd3155bb4bee85e9375dd9458297" /></p> <p align="center"><span style="text-align: justify; ">അമാല്ഗം ഫില്ലിംഗ്. - 1</span> അമാല്ഗം ഫില്ലിംഗ് 2</p> </td> </tr> </tbody> </table> <p style="text-align: justify; "><strong><span><br /> </span></strong>സാധാരണയായി മെര്ക്കുറിയും സില്വര് അല്ലോയ് പൌഡറും മിക്സ് ചെയ്തുണ്ടാക്കുന്ന അമാല്ഗമാണ് പല്ലിലെ പോടടയ്ക്കാനായി ഉപയോഗിക്കുന്നത്.<br /> ഇതിനു ഒരുപാട് ഗുണങ്ങളും കുറച്ച് ചെറിയ ദോഷങ്ങളുമുണ്ട്.<br /> <br /> <strong><span>ഗുണങ്ങള്</span></strong><strong><span> </span></strong><br /> a . ഈട് - നല്ല രീതിയില് ചെയ്യുന്ന അമാല്ഗം ഫില്ലിംഗ് 15 - 20 വര്ഷത്തോളം ഒരു കുഴപ്പവുമില്ലാതെ ഇരിക്കാറുണ്ട്. ചിലത് ജീവിതാന്ത്യം വരെപോലും.<br /> b . ചെയ്യുവാന് താരതമ്യേന എളുപ്പം.<br /> c. ചെലവ് കുറവ്<br /> d.നല്ല ഫിനിഷിംഗ്<br /> <br /> <strong><span>ദോഷങ്ങള്</span></strong><br /> a . പല്ലിന്റെ നിറമല്ല<br /> b.പല്ലിനോട് ഒട്ടിച്ചേര്ന്നു നില്ക്കുന്നതല്ല.<br /> c. മെര്ക്കുറിയുടെ ഡിസ്പോസല് രീതി പരിസ്ഥിതിക്ക് ദോഷം വരാതെ ശ്രദ്ധിക്കണം.<br /> <br /> 2. ഗ്ലാസ് അയണോമര് സിമന്റ് / G.I.C <br /> <br /> പല്ലിന്റെ നിറമുള്ള ഒരു സിമന്റ് ആണിത്. വെവ്വേറെ ബോട്ടിലുകളില് പൊടിയും ലിക്വിഡ് ഉം ആയി ലഭിക്കുന്ന ഈ സിമന്റ് രണ്ട് കംപോണന്റ്റും കൃത്യമായ അനുപാതത്തില് മിക്സ് ചെയ്താണ് ആവശ്യാനുസരണം ഉപയോഗിക്കുന്നത്.<br /> <br /> പല പല ബലത്തില് ലഭിക്കുന്ന ഇവ വിവിധ ആവശ്യങ്ങള്ക്കായി ഉപയോഗിക്കാം.<br /> പല്ലിനോട് ഒരു രാസപ്രവര്ത്തനം വഴി ഒട്ടിപ്പിടിച്ചിരിക്കുന്ന ഈ സിമന്റ് ആണ് പല്ലിന്റെ തേയ്മാനങ്ങള് നികത്താനായി ഉപയോഗിക്കാറ്.</p> <table style="text-align: justify; "> <tbody> <tr> <td> <p align="center"><a href="http://2.bp.blogspot.com/-8hZ_g3ktg4c/VUzjiEE3_zI/AAAAAAAABNo/4rUUC4afdMc/s1600/GIC-filling.jpg"></a></p> </td> </tr> <tr> <td> <p align="center"><img class="image-inline" src="../../../resolveuid/0084e307368744afa52ac20e63b8bf5b" /></p> <p align="center">1.ജി ഐ സി ഫില്ലിംഗ് - തേയ്മാനം ചികിത്സിക്കാന് ഉപയോഗിച്ചിരിക്കുന്നു</p> </td> </tr> </tbody> </table> <table style="text-align: justify; "> <tbody> <tr> <td> <p align="center"><a href="http://2.bp.blogspot.com/-jnOXCxRDJTo/VUzjihANRBI/AAAAAAAABNs/0V0BBZ5dBpk/s1600/gic.jpg"></a></p> </td> </tr> <tr> <td> <p align="center"><img class="image-inline" src="../../../resolveuid/28d027ca1f86408285f388006749a6b2" /></p> <p align="center">2. ജി ഐ സി ഫില്ലിംഗ് - പോടടയ്ക്കാനായി ഉപയോഗിച്ചിരിക്കുന്നു.</p> </td> </tr> </tbody> </table> <p style="text-align: justify; ">3. കോംപോസിറ്റ് ഫില്ലിംഗ് <br /> ഇപ്പോള് വളരെ പ്രചാരത്തിലുള്ള മറ്റീരിയല് ആണ് ഡെന്റല് കോംപോസിറ്റ് .<br /> ഏറ്റവും മികച്ച രീതിയില് പല്ലിനോട് ഒട്ടിപ്പിടിച്ചു നില്ക്കുന്നതായതിനാല് ബലം കൂടുതായിരിക്കും.<br /> പല പല ഷേഡുകളില് ലഭിക്കുന്ന ഇത്തരം ഫില്ലിങ്ങുകള് യാതൊരുവിധ കൃത്രിമത്വവും തോന്നാത്തവിധം പല്ലിന്റെ കേടുകളും കുറവുകളും മാറ്റാന് ഉപയോഗിക്കാം.<br /> അപകടങ്ങളില് ഭാഗികമായി പൊട്ടിപോകുന്ന പല്ലുകളുടെ ചില തരം പൊട്ടലുകള് ഈ മറ്റീരിയല് ഉപയോഗിച്ചാണ് പഴയ രൂപത്തിലാക്കാറുള്ളത് .</p> <table style="text-align: justify; "> <tbody> <tr> <td> <p align="center"><a href="http://1.bp.blogspot.com/-DF_Q-OSo0rw/VUzkGRH3CnI/AAAAAAAABN4/OFBfyr1_gm4/s1600/whitefillings.jpg"></a></p> </td> </tr> <tr> <td> <p align="center"><img class="image-inline" src="../../../resolveuid/3bdbe94431de4e49a93728cef6fad170" /></p> <p align="center">മുകളില് എ എഫ് ചെയ്ത പല്ലുകള് കോംപോസിറ്റ് ആക്കിയപ്പോള് ഉള്ള വ്യത്യാസം ശ്രദ്ധിക്കുക .</p> </td> </tr> </tbody> </table> <table style="text-align: justify; "> <tbody> <tr> <td> <p align="center"><a href="http://2.bp.blogspot.com/-oO3E_eBckzI/VUzlnFj8iNI/AAAAAAAABOE/GOZDjZTJnFo/s1600/5660421.jpg"></a></p> </td> </tr> <tr> <td> <p align="center"><img class="image-inline" src="../../../resolveuid/29a9f94d5bba44308b15868c06396976" /></p> <p align="center">പൊട്ടിയ മുന്നിര പല്ലിനെ കോംപോസിറ്റ് കൊണ്ട് പുനസൃഷ്ടിചിരിക്കുന്നു .</p> </td> </tr> </tbody> </table> <p style="text-align: justify; ">4 . കാസ്റ്റ് മെറ്റല് ഫില്ലിംഗ്സ് ( ഇന്ലേ / ഓണ് ലേ / ഓവര് ലേ )</p> <p style="text-align: justify; ">ചില അവസരങ്ങളില് അമാല്ഗം / ജി ഐ സി / കോംപോസിറ്റ് എന്നീ ഫില്ലിങ്ങുകളെ ക്കാള് ബലം ആവശ്യമാകുന്ന വിധത്തില് ദന്തക്ഷയം പരക്കെ വ്യാപിച്ചിരിക്കാം . അങ്ങനെ വന്നാല് ലോഹങ്ങളില് കാസ്റ്റ് ചെയ്തെടുക്കുന്ന പ്രത്യേക തരം ഫില്ലിങ്ങുകള് ആവശ്യമാണ്. ഇവ പ്രധാനമായും ഇന് ലേ അല്ലെങ്കില് ഓണ് ലേ എന്ന് വിളിക്കപെടുന്ന ഫില്ലിംഗ്സ് ആണ്.</p> <table style="text-align: justify; "> <tbody> <tr> <td> <p align="center"><a href="http://4.bp.blogspot.com/-PsswgsGgcK8/VUzorl3FQII/AAAAAAAABOQ/FQeMgWTkIdU/s1600/Inlay_onlay_overlay.jpg"></a></p> </td> </tr> <tr> <td> <p align="center"><img class="image-inline" src="../../../resolveuid/1cc61a34f2164febb0e918f88fc56458" /></p> <p align="center">ക്രമത്തില് ഇന് ലേ , ഓണ് ലേ , ഓവര് ലേ</p> </td> </tr> </tbody> </table> <p style="text-align: justify; "><img class="image-inline" src="../../../resolveuid/5d81462122774033aedf659f2884c243" /> <img class="image-inline" src="../../../resolveuid/e8661bdfb4e941e69f1c8448811281c7" /></p> <p style="text-align: justify; ">ഫുള് മെറ്റല് ഓണ് ലേ യുടെ രണ്ട് സാമ്പിളുകള് മുകളില് <br /> <br /> 4. ഗോള്ഡ് ഫില്ലിംഗ്സ് <br /> <br /> നമ്മുടെ പണ്ടത്തെ "സ്വര്ണ്ണം കെട്ടിയ" പല്ലുകള് തന്നെ.<br /> <br /> ഇപ്പോഴും ഏറ്റവും ഐഡിയല് ആയ ഫില്ലിംഗ് ആയാണ് ഗോള്ഡ് ഫില്ലിംഗ്സ് അറിയപ്പെടുന്നത്. കാരണം മറ്റു എല്ലാ ഫില്ലിംഗ് സിനും എന്തെങ്കിലും ഒരു കുറവ് ഉള്ളത് ഒന്നും പ്രതിപ്രവര്ത്തനം ചെയ്യാത്ത ലോഹം ആയത് കൊണ്ട് ഗോള്ഡ് ന് ഇല്ല.<br /> <br /> സ്വാഭാവികമായും ചെലവ് വളരെ കൂടുതലാണ് എന്നതും വെളുത്ത നിറമല്ല എന്നതും ഇതിന്റെ ഉപയോഗത്തിന് വിഘാതം ആണെങ്കിലും ഇപ്പോഴും ചിലര് ഗോള്ഡ് ഫില്ലിംഗ്സ് തന്നെ വേണം എന്ന് ആവശ്യപെടാരുണ്ട്.</p> <p style="text-align: justify; "><img class="image-inline" src="../../../resolveuid/0d52dc1be2f74ffbb8ddef2931f1ed4d" /></p> <p style="text-align: justify; "><a href="http://1.bp.blogspot.com/-dmpxOQhVib8/VUzry188wvI/AAAAAAAABO0/-0kcZcVP_D0/s1600/lonergan-before-fig2.jpg"></a></p> <p style="text-align: justify; ">a. സ്വര്ണ്ണം കെട്ടിയ പല്ലുകള്.</p> <p style="text-align: justify; "><img class="image-inline" src="../../../resolveuid/2fe4069324bb4518964e0f97da530bfe" /></p> <p style="text-align: justify; ">b. ഗോള്ഡ് ഫില്ലിംഗ്സ് .</p> <p style="text-align: justify; ">ഇതൊക്കെയാണെങ്കിലും പല്ലില് പോട് വരാതെ സൂക്ഷിക്കുക എന്നതാണ് ഏറ്റവും നല്ല ചികിത്സ.</p> <h3 style="text-align: justify; ">ദന്താരോഗ്യം : എല്ലാവരും അറിഞ്ഞിരിക്കേണ്ട ചില കാര്യങ്ങള്</h3> <p style="text-align: justify; ">മനുഷ്യശരീരത്തിലെ വളരെ പ്രാധാന്യമര്ഹിക്കുന്ന ഒരു ഭാഗമാണ് പല്ലുകളും നാവും മുഖപേശികളും ഉമിനീര് ഗ്രന്ഥികളും എല്ലാം ഉള്പ്പെടുന്ന ഓറല് ആന്ഡ് മാക്സില്ലോഫേഷ്യല് റീജിയന് .( താഴത്തെ ചിത്രത്തില് മഞ്ഞ വരയ്ക്കകത്തുള്ളത്</p> <p style="text-align: justify; "><img class="image-inline" src="../../../resolveuid/f9fa0d43e6564e1a99444adb99c1020d" /></p> <p style="text-align: justify; "><strong><span>1.</span></strong><strong><span>പല്ലുകള്</span></strong></p> <p style="text-align: justify; "><strong><span>a. </span></strong><strong><span>അനാട്ടമി</span></strong></p> <p style="text-align: justify; ">പൂര്ണവളര്ച്ചയെത്തിയ, ആരോഗ്യവാനായ മനുഷ്യന്റെ വായ്ക്കകത്ത് രണ്ട് താടിയെല്ലുകളിലുമായി 16 എണ്ണം വീതം മൊത്തത്തില് 32 പല്ലുകള് ഉണ്ടായിരിക്കും.</p> <p style="text-align: justify; ">ഈ പല്ലുകളെല്ലാം തന്നെ താടിയെല്ലിലെ അവയുടേതായ സോക്കറ്റുകളില് സ്ഥിതിചെയ്യുന്നു.സസ്തനികളില് കാണപ്പെടുന്ന ദന്തനിരയുടെ ഈ അവസ്ഥയെ തീക്കോഡോണ്ട് (Thecodont Dentition) എന്നാണ് പറയുക . പരിണാമത്തിന്റെ നാള്വഴികളില് ഇതൊരു പ്രധാന പുരോഗമനം ആയിരുന്നു.</p> <p style="text-align: justify; "><img class="image-inline" src="../../../resolveuid/cea0c5a177194d948acf82066ead46d8" /></p> <table style="text-align: justify; "> <tbody> <tr> <td> <p align="center"><a href="http://3.bp.blogspot.com/-_kHXDnC2DkM/VToKvaLD3hI/AAAAAAAABJ0/P7wz8XcZluk/s1600/Fig.%2B1.jpeg"></a></p> </td> </tr> <tr> <td> <p align="center"><img class="image-inline" src="../../../resolveuid/be640d82f77b42958d8cc8f86d5d1461" /></p> <p align="center">ടൂത്ത് സോക്കറ്റ് : പല്ലെടുത്തതിനു ശേഷമുള്ള കാഴ്ച്ച</p> </td> </tr> </tbody> </table> <p style="text-align: justify; ">അതുപോലെത്തന്നെ , ജീവിതകാലയളവില് രണ്ട് ജോഡി ദന്തങ്ങള് മനുഷ്യന് ഉണ്ടാകുന്നു. അതുകൊണ്ട് മനുഷ്യന്റെ ദന്തങ്ങളെ ഡിഫിയോഡോണ്ട് ( Diphyodont) എന്ന് പറയാം.</p> <p style="text-align: justify; ">ഒരു കുഞ്ഞ് ജനിച്ച് ആറാം മാസം മുതല് മുളച്ചു തുടങ്ങുന്ന ആദ്യത്തെ ജോഡിയെ M<strong>ilk Teeth/ Deciduous Dentition </strong>അഥവാ കോമളദന്തം എന്നും , ആറു വയസ്സില് മുളച്ചുതുടങ്ങുന്ന ദന്തനിരയെ <strong>Permanent Dentition</strong> അഥവാ സ്ഥിരദന്തം എന്നും പറയുന്നു.</p> <p style="text-align: justify; ">(ചില ജീവികളില് ഒരൊറ്റ ജോഡി പല്ലുകള് മാത്രമേ അവയുടെ ജീവിതകാലയളവില് ഉണ്ടാവാറുള്ളൂ (Monophyodont ) .അതേ സമയം ചിലജീവികളില് പലനിര ദന്തങ്ങള് ഉണ്ടാകും (Polyphyodonts). ഉദാ:<strong> </strong><strong>കങ്കാരു </strong><strong>, </strong><strong>ആന (</strong><strong>6</strong><strong> സെറ്റ് പല്ലുകള് ) .</strong></p> <p style="text-align: justify; "><strong>സ്രാവിന്റെ </strong>കാര്യത്തിലാണെങ്കില് പല്ലുകള് ഓരോ നിര കൊഴിയുമ്പോഴും പുതിയ നിര <strong> </strong><strong> </strong>അവരുടെ ജീവിതത്തിലുടനീളം മുളച്ചുകൊണ്ടേയിരിക്കുന്നു</p> <p style="text-align: justify; ">മനുഷ്യരടക്കമുള്ള സസ്തനികളില് ഉള്ള വേറൊരു പ്രത്യേകതയാണ് പല ഉപയോഗത്തിനായി പല ആകൃതിയില് ഉള്ള പല്ലുകള് അഥവാ ഹെട്ടറോഡോണ്ട് ഡെന്ടിഷന് (HETERODONT) . കടിച്ചു മുറിക്കുന്നതിനായും ചവച്ചരയ്ക്കുന്നതിനായും യോജിച്ച പോലെ അവ രൂപാന്തരപ്പെട്ടിരികുന്നു</p> <p style="text-align: justify; ">ബാഹ്യരൂപത്തിന്റെ അടിസ്ഥാനത്തില് പല്ലുകള്</p> <p style="text-align: justify; ">1.ഇന്സിസേഴ്സ് ,( മുന്നിരയിലെ പല്ലുകള് )</p> <p style="text-align: justify; ">2.കനൈന്സ് , (കോമ്പല്ല് )</p> <p style="text-align: justify; ">3.പ്രീമോളാര്സ് ,(കുഞ്ഞണപ്പല്ലുകള്)</p> <p style="text-align: justify; ">൪.മോളാര്സ് (അണപ്പല്ലുകള് ) എന്നിങ്ങനെ 4 വിധമുണ്ട്.</p> <p style="text-align: justify; "><img class="image-inline" src="../../../resolveuid/7b9147bfe8ce4c40b3ea91288e7d0bac" /></p> <p style="text-align: justify; "><span>b </span><span>.</span><span>രൂപ ഘടന</span></p> <p style="text-align: justify; "><span><img class="image-inline" src="../../../resolveuid/902a2fa3e80840aa8b147093cb837898" /></span></p> <p style="text-align: justify; ">മുകളിലെ ചിത്രത്തില് കാണുന്നതുപോലെ പല്ലിനെ "പ്രധാനമായും" നാല് ഭാഗങ്ങളായി തിരിക്കാം .</p> <p style="text-align: justify; ">1.ഏറ്റവും പുറത്തുള്ള വെളുത്ത പാളി ആയ <strong>ഇനാമല്</strong><strong> </strong></p> <p style="text-align: justify; ">2.രണ്ടാമത്തെ പാളി ആയ <strong>ഡെന്റ്റീന്</strong><strong> </strong></p> <p style="text-align: justify; ">3.രക്തക്കുഴലുകളും ഞരമ്പുകളും എല്ലാം ഉള്ളതുമായ ഏറ്റവും ഉള്ളിലെ ഭാഗം- <strong>പള്പ്പ്</strong><strong> </strong></p> <p style="text-align: justify; ">4.വേരിന് മുഴുവനായി കവചിതസംരക്ഷണം കൊടുക്കുന്ന<strong> - </strong><strong>സിമന്റം (</strong><strong> </strong>വേരില് ഇനാമല് ഇല്ല<strong> )</strong></p> <p style="text-align: justify; "><strong><span>1.</span></strong><strong><span>ഇനാമല്</span></strong><strong><span> </span></strong></p> <p style="text-align: justify; ">എല്ലാവര്ക്കും അറിയാവുന്നത് പോലെ , ഇനാമല് ആണ് മുഴുവന് മനുഷ്യ ശരീരത്തിലെത്തന്നെ ഏറ്റവും ബലമേറിയ/കാഠിന്യമേറിയ ഭാഗം . ശരീരത്തിലെ ഏറ്റവും ധാതുസമ്പന്നമായ (96%). ഭാഗവും ഇനാമല് തന്നെയാണ് .</p> <p style="text-align: justify; ">എന്നിരുന്നാലും ഇനാമല് , അമ്ലങ്ങളുമായുള്ള (വീര്യം വളരെ കുറവായതെങ്കിലും ) സ്ഥിരസമ്പര്ക്കത്തില് എളുപ്പം വിഘടിക്കുന്നു.അങ്ങനെയാണ് പുഴുപല്ല് /കേട് /പോട് / ഡെന്റല് കേരീസ് (DENTAL CARIES) ഉണ്ടാവുന്നത്.</p> <p style="text-align: justify; "><span>2.</span><strong><span>ഡെന്റ്റീന്</span></strong><strong><span> </span></strong><span>(DENTIN)</span></p> <p style="text-align: justify; ">ഇതാണ് ഇനാമലിന്റെ തൊട്ടുതാഴെ കിടക്കുന്ന നേരിയ മഞ്ഞ നിറമുള്ള ഭാഗം. സ്വാഭാവികമായി സുതാര്യമായ ഇനാമലില് കൂടി റിഫ്രാക്റ്റ് ചെയ്ത് വരുന്ന വെളിച്ചം ഈ ഭാഗത്തില് നിന്ന് പ്രതിഫലിക്കുന്നത് കൊണ്ടാണ് ആരോഗ്യമുള്ള പല്ലുകള്ക്ക് നേര്ത്ത ഒരു മഞ്ഞനിറം പോലെ തോന്നുന്നത്.</p> <p style="text-align: justify; ">അതിസൂക്ഷ്മമായ ആയിരക്കണക്കിനു കുഴലുകള് നിറഞ്ഞ പല്ലിന്റെ ഈ ഭാഗത്താണ് വളരെ ചെറിയ നാഡികള് ഉള്ളത്.. ( പല്ലിന് / ഇനാമലിന് തേയ്മാനം വരുമ്പോള് തണുപ്പ് / ചൂട് / കാറ്റ് എന്നിവയുടെ സമ്പര്ക്കത്തില് ഈ നാഡികള് ഉത്തേജിക്കപെടുകയും അസഹനീയമായ പുളിപ്പ് / വേദന തോന്നുകയും ചെയ്യുന്നു : സെന്സോഡെയ്ന് ടൂത്ത്പേസ്റ്റ് ന്റെ പരസ്യം ഓര്മിക്കുക :) )</p> <p style="text-align: justify; ">പല്ലില് കേടുണ്ടാകുമ്പോള് ഇനാമല് ദ്രവിച്ച് ഈ ഭാഗത്ത് അണുക്കളും അവയുടെ ജീവനപ്രവര്ത്തനഫലമായുണ്ടാകുന്ന രാസവസ്തുക്കള് , ടോക്സിക് പദാര്ത്ഥങ്ങള് ഒക്കെ തങ്ങിനില്ക്കുപോഴാണ് നമുക്ക് നേരിയ വേദന അനുഭവപ്പെട്ടു തുടങ്ങുന്നത്.</p> <p style="text-align: justify; ">അത് വകവയ്ക്കാതെ നമ്മള് മുന്നോട്ട് പോകുമ്പോള് , രോഗാണുക്കളും അവരുടെ പാതയില് ധീരമായി മുന്നേറുന്നു .. അങ്ങനെ ദന്തക്ഷയം പല്ലിന്റെ ഏറ്റവും കാതലായ ഭാഗത്ത് - പള്പ്പില് - എത്തുന്നു.</p> <p style="text-align: justify; "><strong><span>3. </span></strong><strong><span>പള്പ്പ്</span></strong></p> <p style="text-align: justify; ">ഇവിടെ , കളി അല്പം കാര്യമായി മാറുന്നു.</p> <p style="text-align: justify; ">എന്തെന്നാല് , അണുക്കള് അവരുടെ "സ്വര്ഗ്ഗത്തില്" എത്തിയിരിക്കുന്നു..</p> <p style="text-align: justify; ">അവരുടെ അതിജീവനത്തിനും , പ്രത്യുല്പാദനത്തിനും ഉതകുന്ന എല്ലാക്കാര്യങ്ങളും ഇവിടെ അവര്ക്ക് കിട്ടും .പോഷക വസ്തുക്കള് - ഗ്ലുക്കോസ് തുടങ്ങിയ സിമ്പിള് കാര്ബോഹൈഡ്രേറ്റ്സ് , പ്രോട്ടീന്സ് , ജലം.. അങ്ങനെ എല്ലാം.</p> <p style="text-align: justify; ">നമ്മുടെ "രോഗപ്രതിരോധ വകുപ്പ്" ( IMMUNE SYSTEM ) കാര്യക്ഷമമായി പണിയെടുത്താല് തന്നെയും , തകര്ന്ന കോട്ടയിലേക്ക് ശത്രുക്കള് എന്ന പോലെ ദന്തക്ഷയം ഉണ്ടാക്കിയ വഴിയിലൂടെ ദിനേന പുതിയ അണുക്കള് എത്തുകയും കോളനിവത്കരണം നടത്തുകയും ചെയ്യുന്നു.</p> <p style="text-align: justify; ">ഈയവസ്ഥയെ ഞങ്ങള് ദന്തവൈദ്യന്മാര് "പള്ൈപ്പറ്റിസ് " എന്ന് വിളിക്കുന്നു.</p> <p style="text-align: justify; ">തത്ഫലമായി ഉണ്ടാവുന്ന യുദ്ധത്തില് , ക്രമേണ ശരീരം അടിയറ വെയ്ക്കുകയും അണുക്കള് പെറ്റുപെരുകി , തൊട്ടടുത്ത കലകളിലേക്ക് പടരുവാന് നോക്കുകയും ചെയ്യുന്നു.യുദ്ധത്തിന്റെ നാശനഷ്ടങ്ങള് പഴുപ്പായി/ചലമായി (ചത്തുപോയ രക്താണുക്കള് + രോഗാണുക്കള് + ഇന്ഫ്ലമേറ്റരി ഫ്ളൂയിട്സ് ) എല്ലാം കെട്ടിക്കിടന്ന ശേഷം ഒടുവില് , ഏറ്റവും എളുപ്പവഴിയിലൂടെ പുറത്ത് പോകുന്നു.</p> <p style="text-align: justify; ">അങ്ങനെ അണുബാധ ഏറ്റ പള്പ്പ് ഒടുവില് വീരചരമം വരിക്കുന്നു.</p> <p style="text-align: justify; ">(അല്ലെങ്കില് ചാവേറിനെ പോലെ ഏറെക്കാലം ധീരമായി ചെറുത്തുനില്ക്കുകയും ഉണ്ടാവാം. അതാണ് BEST CASE SCENARIO ) .</p> <p style="text-align: justify; "> </p> <p style="text-align: justify; ">കടപ്പാട്:</p> <p style="text-align: justify; "><span>ഡോ.അജിത് സുബ്രഹ്മണ്യന്</span><strong><span> BDS</span></strong></p> </div>