<div id="MiddleColumn_internal"> <p style="text-align: justify; ">ಮಹಿಳೆಯರ ಉಲ್ಲಾಸದ ಮೂಲ ಇರುವುದೇ ಪುಟಿಯುವ ಆತ್ಮವಿಶ್ವಾಸದಲ್ಲಿ. ಮೃದುವಾದ ತ್ವಚೆ, ಅಂದದ ನೋಟ ಇವೆರಡೂ ಆತ್ಮವಿಶ್ವಾಸದ ಖನಿಯಾಗಿಸುತ್ತವೆ. ಈ ನಿಟ್ಟಿನಲ್ಲಿ ಬೇಡದ ರೋಮನಿವಾರಣೆಗಾಗಿ ಎಲ್ಲ ವರ್ಗದ ಜನರೂ ಶಕ್ತ್ಯಾನುಸಾರ ಸಮಯ ಹಣ ವ್ಯಯ ಮಾಡುತ್ತಾರೆ.</p> <p style="text-align: justify; ">ಆದರೆ ಶೇವಿಂಗ್ ಸರಳ ಉಪಾಯವಾದರೂ ಹಲವಾರು ತಪ್ಪು ಕಲ್ಪನೆಗಳು ಇದರ ಸುತ್ತ ಹುತ್ತ ಕಟ್ಟಿವೆ. ಅವೆಷ್ಟು ಸತ್ಯ ಎನ್ನುವುದು ಅರಿಯುವ.</p> <ul> <li>ಪ್ರತಿದಿನ ಶೇವ್ ಮಾಡಿಕೊಳ್ಳುವುದರಿಂದ ಕೂದಲು ಇನ್ನಷ್ಟು ದಟ್ಟವಾಗಿ, ಕಪ್ಪಾಗಿ ಮತ್ತು ವೇಗವಾಗಿ ಬೆಳೆಯುತ್ತದೆ.</li> <li>ಇದು ಸುಳ್ಳು. ಕೂದಲು ಪುನಃ ಬೆಳೆಯುವುದು ನಿಮ್ಮ ದೇಹದ ಪ್ರಕೃತಿ, ಹಾರ್ಮೋನ್ ಮತ್ತು ವಂಶವಾಹಿಯನ್ನು ಆಧರಿಸಿದೆ. ನಿತ್ಯ ಶೇವ್ ಮಾಡಿಕೊಳ್ಳುವುದರಿಂದ ತ್ವಚೆ ಮೃದುವಾಗುತ್ತದೆ. ಕಂಕುಳಲ್ಲಿನ ಕೂದಲು ಕಾಲಿಗಿಂತ ಶೇ. 50ರಷ್ಟು ವೇಗವಾಗಿ ಬೆಳೆಯುತ್ತವೆ. ಹೀಗಾಗಿ ತಪ್ಪು ಕಲ್ಪನೆ ಮನೆ ಮಾಡಿರಬಹುದು.</li> <li>ತ್ವಚೆ ಕಪ್ಪಾಗುತ್ತದೆ ಮತ್ತು ಬಿರುಕು ಮೂಡುತ್ತದೆ.</li> <li>ತ್ವಚೆಯಲ್ಲಿನ ನಿರ್ಜೀವ ಕೋಶಗಳ ನಿರ್ಮೂಲನೆಯಾಗುತ್ತದೆ. ತ್ವಚೆ ನುಣುಪಾಗುತ್ತದೆ.</li> <li>ಕೂದಲು ವೇಗವಾಗಿ ಬೆಳೆಯುತ್ತದೆ.</li> <li>ಇಲ್ಲ. ಕೂದಲು ವೇಗವಾಗಿ ಬೆಳೆಯುವುದಿಲ್ಲ. ದೇಹದ ವಿವಿಧ ಭಾಗಗಳಲ್ಲಿ ಕೂದಲು ಬೆಳೆಯಲು ಭಿನ್ನ ಅವಧಿಯನ್ನು ತೆಗೆದುಕೊಳ್ಳುತ್ತದೆ. ವಯಸ್ಸು, ಋತುಮಾನ ಇವೆರಡನ್ನೂ ಗಮನದಲ್ಲಿರಿಸಿಕೊಳ್ಳಬೇಕು. ಇಳಿವಯಸ್ಸಿನಲ್ಲಾದರೆ ಕೂದಲು ಬೆಳವಣಿಗೆಯಾಗುವುದೇ ನಿಧಾನ. ಬೇಸಿಗೆಯಲ್ಲಿ ಬಲುಬೇಗ ಕೂದಲು ಬೆಳೆಯುತ್ತದೆ.</li> <li>ಹಳೆ ಬ್ಲೇಡಿಗಿಂತ ಹೊಸ ಬ್ಲೇಡ್ ಹೆಚ್ಚು ಗಾಯಗಳನ್ನು ಮಾಡುತ್ತದೆ.</li> <li>ವಾಸ್ತವ ಏನೆಂದರೆ ಹಳೆ ಬ್ಲೇಡ್ ಗಾಯಗಳನ್ನು ಮಾಡುವುದು ಹೆಚ್ಚು. ಅಲ್ಲದೇ ಅದರಿಂದ ಮೃದುವಾದ ಶೇವಿಂಗ್ ಸಾಧ್ಯವಾಗುವುದಿಲ್ಲ. ಸಿಂಗಲ್ ಬ್ಲೇಡ್ ಬಳಕೆ ಅಥವಾ ರೇಜರ್ ಮೇಲೆ ಅತಿಯಾದ ಒತ್ತಡ ಹಾಕುವುದರಿಂದ ಗಾಯಗಳು ಆಗಬಹುದು.</li> <li>ರೇಜರ್ ಗಟ್ಟಿಯಾಗಿ ಒತ್ತಿದರೆ ಮೃದುವಾದ ಶೇವಿಂಗ್ ಸಾಧ್ಯ.</li> <li>ಯಾರು ಹೇಳಿದ್ದು ಹಾಗೆ? ರೇಜರ್ ಮೇಲೆ ಅತಿಯಾದ ಒತ್ತಡ ಹಾಕಿದರೆ ಗಾಯಗಳಾಗಬಹುದು. ನಿಮ್ಮ ತ್ವಚೆಗೆ ವಿರುದ್ಧ ದಿಕ್ಕಿನಲ್ಲಿ ರೇಜರ್ ಓಡಿಸಿ. ಇದರಿಂದ ಕೆಲಸ ಸುಲಭವಾಗುತ್ತದೆ. ಒಳ್ಳೆಯ ಶೇವಿಂಗ್ಗೆ ಲೈಟ್ ಟಚ್ ನೀಡಿದರೆ ಸಾಕು.</li> <li>ಒಂದೇ ಜಾಗದಲ್ಲಿ ಪುನಃಪುನಃ ಶೇವ್ ಮಾಡಿಕೊಳ್ಳುತ್ತಿದ್ದರೆ ಉತ್ತಮ ಫಲಿತಾಂಶ ಪಡೆಯಬಹುದು.</li> <li>ಇದೂ ತಪ್ಪು ಕಲ್ಪನೆ. ಹೀಗೆ ಮಾಡುವುದರಿಂದ ಚರ್ಮದಲ್ಲಿ ಅಲರ್ಜಿ ಕಾಣಿಸಿಕೊಳ್ಳಬಹುದು. ರೇಜರ್ ಮೊದಲಿನ ಮೃದು ಅನುಭವ ನೀಡುತ್ತಿಲ್ಲ ಎನ್ನುವುದು ಅರಿವಿಗೆ ಬಂದ ತಕ್ಷಣ ಬ್ಲೇಡ್ ಬದಲಿಸುವುದು ಉತ್ತಮ.</li> <li>ಮಂಡಿ ಮೇಲ್ಭಾಗದಲ್ಲಿ ಮಾತ್ರವೇ ಶೇವ್ ಮಾಡಿಕೊಳ್ಳಬೇಕು.</li> <li>ಇದು ನಿಮ್ಮ ವೈಯಕ್ತಿಕ ಆಯ್ಕೆಗೆ ಬಿಟ್ಟದ್ದು. ನಿಮಗೆ ಯಾವುದು ಆರಾಮ ಅನ್ನಿಸುತ್ತದೆಯೊ ಹಾಗೂ ನಿಮ್ಮ ಸೌಂದರ್ಯಪ್ರಜ್ಞೆಗೆ ಯಾವುದು ಸೂಕ್ತ ಅನ್ನಿಸುತ್ತದೆಯೊ ಹಾಗೆ ಮಾಡಿ.</li> <li>ಪುರುಷರ ರೇಜರ್ ಅನ್ನೇ ಸ್ತ್ರೀಯರೂ ಬಳಸಬಹುದು.</li> <li>ಇದು ಖಂಡಿತವಾಗಿಯೂ ಸರಿಯಲ್ಲ. ನೈರ್ಮಲ್ಯದ ಕಾರಣದಿಂದ ಹೀಗೆ ಮಾಡುವುದು ಸರಿಯಲ್ಲ. ಮಹಿಳಾ ರೇಜರ್ಗಳನ್ನು ನಿಮ್ಮ ಅಂಗಾಂಗಗಳ ತಿರುವುಗಳಿಗೆ (ಕರ್ವ್) ಅನುಗುಣವಾಗಿ ವಿಶಿಷ್ಟವಾಗಿ ರೂಪಿಸಲಾಗಿರುತ್ತದೆ.</li> <li>ಪ್ರತಿದಿನ ಶೇವಿಂಗ್ ಮಾಡಿಕೊಳ್ಳುವುದು ತ್ವಚೆ ಆರೋಗ್ಯಕ್ಕೆ ಒಳ್ಳೆಯದಲ್ಲ.</li> <li>ಇದೂ ತಪ್ಪು. ನಿಮ್ಮ ಕಂಕುಳು ಅಥವಾ ಕಾಲುಗಳಲ್ಲಿ ಅತಿವೇಗವಾಗಿ ಕೂದಲು ಬೆಳೆಯುತ್ತಿದ್ದರೆ ಅಥವಾ ದಟ್ಟವಾಗಿ ಬೆಳೆಯುತ್ತಿದ್ದರೆ ನಿತ್ಯ ಶೇವ್ ಮಾಡಿಕೊಳ್ಳುವುದು ಜಾಣ ಆಯ್ಕೆ.</li> </ul> <p style="text-align: justify; "><i><strong> ಮೂಲ : </strong></i> <a class="external-link ext-link-icon" href="http://www.prajavani.net/article/%E0%B2%A8%E0%B3%81%E0%B2%A3%E0%B3%81%E0%B2%AA%E0%B2%BE%E0%B2%A6-%E0%B2%A4%E0%B3%8D%E0%B2%B5%E0%B2%9A%E0%B3%86%E0%B2%97%E0%B3%86" target="_blank" title="Ext link title"> ಪ್ರಜಾವಾಣಿ </a></p> </div>