<div id="Middlecolumn_internal"> <h3 style="text-align: justify;">ராகி கூழ்</h3> <p style="text-align: justify;">காலையில் ராகி சாப்பிடுவதால் உடல் ஆரோக்கியம் மேம்படும்.</p> <p style="text-align: justify;">அத்தகைய ராகியை கூழ் அல்லது கஞ்சி போன்று செய்து சாப்பிடலாம். பலரும் கடையில் விற்கப்படும் ராகி மாவு கொண்டு தான் கூழ் செய்து குடிப்பார்கள்.</p> <p style="text-align: justify;">ஆனால் ராகியை வாங்கி ஊற வைத்து அரைத்து பால் எடுத்து கூழ் செய்து குடித்தால், அதன் சுவையே அலாதி தான்.</p> <p style="text-align: justify;">இங்கு அப்படி ராகியை ஊற வைத்து பால் எடுத்து எப்படி கூழ் செய்வதென்று கொடுக்கப்பட்டுள்ளது.</p> <p style="text-align: center;"><img class="image-inline" src="https://static.vikaspedia.in/media_vikaspedia/ta/images/health/b86bb0b95bcdb95bbfbafb95bcd-b95bc1bb1bbfbaabcdbaabc1b95bb3bcd/ragimalt.jpg" /></p> <h3>தேவையான பொருட்கள்</h3> <p style="text-align: justify;">ராகி - 2 டேபிள் ஸ்பூன், தண்ணீர் - தேவையான அளவு, நெய் - 1/4 டீஸ்பூன், வெல்லப்பாகு - 2 டீஸ்பூன்.</p> <h3 style="text-align: justify;">செய்முறை</h3> <p style="text-align: justify;">முதலில் ராகியை இரவில் படுக்கும் முன் நீரில் ஊற வைத்துக் கொள்ள வேண்டும்.</p> <p style="text-align: justify;">பின்னர் மறுநாள் காலையில் மீண்டும் ராகியைக் கழுவி, மிக்ஸியில் போட்டு 2-3 முறை அடித்துக் கொள்ள வேண்டும்.</p> <p style="text-align: justify;">பின் அதில் சிறிது தண்ணீர் ஊற்றி மீண்டும் நன்கு அரைத்துக் கொள்ள வேண்டும். பின் ஒரு பாத்திரத்தில் துணியை விரித்து, அத்துணியில் அரைத்த ராகியை ஊற்றி நன்கு பிழிந்து பால் எடுத்துக் கொள்ள வேண்டும்.</p> <p style="text-align: justify;">வேண்டுமானால், அரைத்த ராகியை இன்னும் சிறிது தண்ணீர் ஊற்றி மீண்டும் அரைத்து பால் எடுத்துக் கொள்ளலாம்.</p> <p style="text-align: justify;">பின்பு ஒரு வாணலியில் அந்த பாலை ஊற்றி, பால் கெட்டியாக இருந்தால், சிறிது தண்ணீர் ஊற்றி அடுப்பில் வைத்து, கரண்டி கொண்டு நன்கு கட்டிகள் சேராதவாறு கிளறி விட வேண்டும்.</p> <p style="text-align: justify;">ஒரு கட்டத்தில் அந்த பால் சற்று கெட்டியாக ஆரம்பிக்கும். அப்போது நெய் மற்றும் சர்க்கரை பாகு சேர்த்து நெருப்பை குறைத்து, மீண்டும் நன்கு கிளறி விட்டு இறக்கி பரிமாறினால், ராகி கூழ் ரெடி!</p> <p style="text-align: justify;">ஆதாரம்: <span class="alt-edited">ஒன் இந்தியா நாளிதழ்</span></p> </div>